Սան Ֆրանցիսկոյի վճռաբեկ դատարանը YouTube վիդեոհոսթինգին պարտավորեցրել է հեռացնել «Մուսուլմանների անմեղություն» ֆիլմի թրեյլերը: Այս մասին հաղորդում է Associated Press-ը:
Ավելի վաղ YouTube-ի ղեկավարությունը հրաժարվել է հեռացնել այդ թրեյլերը՝ հայտարարելով, որ այն չի խախտում վիդեոհոսթինգի կանոնները:
Դատարանը նման որոշում է ընդունել՝ քննելով 2012-ի սեպտեմբերին դերասանուհի Սինդի Լի Գարսիայի ներկայացրած հայցը, ով ֆիլմում մարմնավորել է գլխավոր դերերից մեկը: Լի Գարսիան նշել է, որ YouTube-ը, առանց իր համաձայնության տեղադրելով թրեյլերը, խախտել է իր հեղինակային իրավունքները: Բացի այդ, դատական հայցում նշվել է, որ դերասանուհուն մոլորեցրել են ֆիլմի ստեղծողները. նա կարծել է, թե նկարահանվում է արկածային դրամայում, ոչ թե «գարշելի, հակաիսլամական ֆիլմում»: Նա նաև հայտնել է, որ ֆիլմի թողարկումից ի վեր իրեն և իր մտերիմներին մի քանի անգամ հաշվեհարդարով են սպառնացել:
Դատարանը վճռել է, որ Լի Գարսիայի հեղինակային իրավունքներն իսկապես խախտվել են, իսկ նրա կյանքն ու առողջությունը՝ հայտնվել վտանգի տակ: Ուստի այն YouTube-ին պարտավորեցրել է հեռացնել սկանդալային թրեյլերը:
YouTube-ի ներկայացուցիչները դատարանի որոշումը դեռևս չեն մեկնաբանել:
