Ինտերնետ-չափումներ իրականացնող Circle.am կայքն ինքն իրենով լուրջ գործիք չէր կարող հանդիսանալ՝ մանավանդ գովազդատուների համար: «Առաջին լրատվական»-ի հետ զրույցում այս մասին ասաց IP Marketing ընկերության տնօրեն Արսեն Սուլթանյանը՝ ասածը հիմնավորելով նրանով, որ մինչ այժմ կայքը տրամադրել է բացառապես հաճախումների քանակական, բայց ոչ՝ որակական տվյալներ:
Նրա խոսքով՝ Circle.am-ը, որդեգրելով կայքերի գնահատման նոր չափորոշիչներ, այն է՝ 9 մոդերատորների միջոցով ռեյտինգային վերահսկողություն սահմանելու գործառույթը, բավական սուբյեկտիվ է աշխատելու: «Նախ, հարց է՝ ովքե՞ր են մոդերատորները, ունե՞ն արդյոք նրանք սեփական կայքեր, որոնց կարող են բարձր վարկանիշներ տալ, տեսականորեն կարո՞ղ են միմյանց հետ պայմանավորվել այս կամ այն կայքին բարձր ռեյտինգ տալու հարցի շուրջ, թե՞ ոչ:
Մեկ այլ հարց է՝ արդյոք մոդերատորները ժամանակի ընթացքում կարո՞ղ են նույն եռանդով, հետևողականությամբ վարկանիշավորել հին ու նոր կայքերը: Իսկ ամենակարևոր հանգամանքն այն է, թե Circle.am-ի 9 մոդերատորներն ինչ սկզբունքով, ինչ մեխանիզմներով են չափում այս կամ այն կայքի լավը կամ վատը լինելը»,- նշեց Արսեն Սուլթանյանը:
IP Marketing ընկերության տնօրենի խոսքով՝ կայքերի օբյեկտիվ ռեյտինգավորում կարող է իրականացնել բացառապես ինտերնետ լսարան չափող միջազգային համակարգը: «Անաչառություն հնարավոր է միայն այս դեպքում, քանի որ միջազգային հեղինակավոր ընկերությունները ավելի կամ պակաս թվեր ցույց տալու խնդիր չունեն, բացի այդ՝ նրանց տեխնիկական հագեցվածությունն ավելի ուժեղ է, քան լոկալ շուկայի համար աշխատող ընկերություններինը:
Հայաստանում պետք է ներդրվի միջազգային մի համակարգ, որը կչափի ինտերնետ-լսարանի որակը՝ ի՞նչ հետաքրքրություններ ունի այն, ուսանողներից, մենեջերներից, տնօրենների՞ց, թե՞ մեկ այլ խմբի մարդկանցից է բաղկացած և այլն»,- ասաց նա:
Ամփոփելով՝ Արսեն Սուլթանյանը դրական գնահատեց, որ Circle.am-ը փորձում է քանակի փոխարեն շեշտադրումներ անել որակի վրա: «Ընդհանուր առմամբ սա լավ միտում է, սակայն այլ հարց է՝ ինչ մեխանիզմներով է կայքը դա անում: Քանակական չափումները Circle.am-ի մոտ լավ չէին ստացվում»,- ասաց IP Marketing ընկերության տնօրենը:
