Բելառուսի նախագահ Ալեքսանդր Լուկաշենկոն հայտարարել է, որ ռուսական կողմը «ոլորում է իր առևտրային գործընկերների ձեռքերը»: Այսպես է նա մեկնաբանել երկրի տարածքից խնձորի և տանձի Ռուսաստան ներմուծման արգելքը, հաղորդում է ԲելՏԱ-ն:
«Որովհետև բարիքը, որ մենք անում ենք Ռուսաստանի Դաշնությանը, անընդհատ մեզ հետ է վերադարձվում չարիքով»,- ասել է Լուկաշենկան:
Նա հիշեցրել է, թե ինչպես է բելառուսական կողմը արձագանքել, երբ տեղեկացել է Բելառուսի տարածքով անցնող նավթամուղի և նավթամթերքի խողովակաշարի վթարային իրավիճակի մասին: Լուկաշենկոյի խոսքերով, դրանք չեն փակվել, որովհետև հաշվի են առել, որ դա կարող է վնաս հասցնել Ռուսաստանին: «Եթե Բելառուսի տարածքով անցնող նավթամուղը և նավթամթերքի խողովակաշարը վերանորոգման կարիք ունեն, ապա դրեք և վերանորոգեք»,- հավելել է նախագահը:
Լուկաշենկոն նաև մեղադրել է կառավարությանը, որն, ըստ նրա, չի տիրապետում ռուսաստանյան շուկա մատակարարումների հետ կապված իրավիճակին: «Մենք պետք է համապատասխան միջոցառումներ ձեռնարկենք: Թե չէ մենք անընդհատ նույնն ենք անում. մեր ձախ այտին ապտակում են՝ մենք աջն ենք դեմ տալիս: Պարզաբանեք և հաջորդ շաբաթ զեկուցեք առանձին»,- ասել է նա:
Ապրիլի 12-ից Ռուսաստանն արգելել է Բելառուսի տարածքից խնձորի և տանձի ներմուծումը: Չի բացառվում նաև ելակի, չինական կաղամբի և սնկի ներմուծման արգելքի ներդրումը: Ռուսաստանի կողմից նման քայլի պատճառը պատժամիջոցների ենթարկված երկրներից անօրինական արտադրանքի հնարավոր մատակարարման մտավախությունն է: