ՀՀ վարչապետ Նիկոլ Փաշինյանի ստրասբուրգյան այցը, նրա ունեցած ելույթը և հարցուպատասխանի կարևոր շեշտադրումները քննարկելու համար «Առաջին լրատվական»-ը հյուրընկալել է քաղաքագետներ Էդգար Վարդանյանին և Սուրեն Պետրոսյանին:
Քաղաքագետ Էդգար Վարդանյանի խոսքով՝ վարչապետի ելույթում առկա էին այն բոլոր թեզերը, որոնք վերջին շրջանում նա առաջ էր քաշել. «Եվ, կարելի է ասել, բոլոր թեզերի կրկնությամբ հավաքական մի ելույթ էր, որում մեզ համար, առաջին տպավորությամբ, նորություն չկար: Հայաստանը մեկ անգամ ևս ցույց տվեց, որ ժողովրդավարական երկիր է դարձել, որ հավատարիմ է իր ստանձնած պարտավորություններին, որ պայքարում է կոռուպցիայի դեմ, որ վստահելի գործընկեր է, որ չի պատրաստվում արտաքին քաղաքական կտրուկ փոփոխություններ անել, որ կենտրոնացած է իր ազգային շահերի վրա, և որ Հայաստանին դուր չի գալիս, երբ որոշ շրջանակներ ցանկանում են ներքաշել աշխարհաքաղաքական հակամարտության ոլորտ»:
Քաղաքագետ Սուրեն Պետրոսյանը ևս կարծում է, որ որևէ նոր բան չասվեց. «Ես ավելի շատ կսպասեի ինստիտուցիոնալ ելույթ, որովհետև մենք չպետք է մոռանանք և՛ Խորհրդարանական վեհաժողովի, և՛ Եվրախորհրդի դերը: Մինչդեռ վարչապետի ելույթում չափաբաժինը մի փոքր խախտված էր. այն ավելի շատ պատմական ակնարկ էր»:
Մեր զրուցակցի խոսքով՝ անձի կերպափոխման խնդիր կա. «Քաղաքական լիդերը խարիզմատիկ լիդերի կարգավիճակից հետո պետք է կերպափոխվի և մտնի ռացիոնալ իրավական լիդերի ֆորմատի մեջ՝ միջազգային հարթությունում ավելի ռացիոնալ դիրքավորվելու համար: Այստեղ ես խարիզմատիկ և իրավառացիոնալ լիդերի միջև խզում տեսա»:
Էդգար Վարդանյանը համաձայն չէ այն կարծիքների հետ, որ Փաշինյանը իր ելույթում չանդրադարձավ համաեվրոպական ընտանիքի մաս կազմելու խնդրին: «Հիմնական մեսիջն այն էր, որ մենք եվրոպական քաղաքակրթության մաս ենք: Այլ բան է, որ նա վարում է անկախ քաղաքականություն՝ հիմնված ազգային շահերի վրա, ինչը չի հակասում եվրոպական քաղաքակրթության մաս լինելուն, ԵՄ-ի հետ խոր հարաբերություններ ունենալուն»: Նա հավելեց նաև, որ կոնկրետություն չի տեսնում այն մեղադրանքների մեջ, թե բացակայում են ինստիտուցիոնալ բարեփոխումները կամ այդ խնդիրների վերաբերյալ ելույթները:
Հարցազրույցն ամբողջությամբ՝ տեսանյութում: