ՀՀ Սպորտի և երիտասարդության հարցերի նախարար Յուրի Վարդանյանը փետրվարի 26-ին ԱԺ-ում լրագրողների հետ ճեպազրույցում անդրադառնալով որդու գործին, նշեց, որ ամեն ինչ նորմալ է, նախարարը չի մասնակցում դատերին, դրանք ընթանում են այնպես, ինչպես պիտի ընթանան, սակայն դա չի նշանակում, որ որդու համար չի անհանգստանում:
Հարցին՝ չի փոխել իր դիրքորոշումը՝ չմիջամտել դատական գործի ընթացքին, նախարարը պատասխանեց. «Ինչի՞ն միջամտեմ, ի՞նչ միջամտեմ, եթե ինքն է սխալ թույլ տվել և իր սխալի համար պետք է պատժվի, միջամտեմ, որ ի՞նչ»:
Անդրադառնալով տեսակետին, թե կարող է օգտագործել իր նախարարական դիրքը՝ որդու գործով անհրաժեշտ որոշում կայացնելու համար, նախարարը նշեց, որ անձնական հարցերի համար պաշտոնական դիրքն օգտագործելը սխալ է համարում, մանավանդ՝ իր որդին է սխալ եղել:
«Ես նախատել եմ որդուս՝ թմրամիջոց օգտագործելու համար, ինձ համար ցավալի է ամեն անգամ խոսել այս թեմայից: Լավ բան չի արել, որևէ մեկի երեխուն չեմ ցանկանա նման բան՝ անկախ նրանից՝ պաշտոնյա է, ոչ պաշտոնյա, ի՞նչ նշանակություն ունի, մարիխուանա ծխել, դա շատ վատ երևույթ է, առավել ևս՝ իմ տղան չպիտի աներ նման բան»,- ասաց նա: Լրագրողներից մեկի դիտարկմանը, թե՝ եթե չի կարողացել իր որդու համար օրինակ ծառայել, կարո՞ղ է երիտասարդ սերնդի համար օրինակ լինել, Վարդանյանն արձագանքեց. «Ի՞նչ է նշանակում, որ չեմ կարողացել օրինակ ծառայել, եթե ես անընդհատ զբաղված եմ եղել, 16 տարի Ամերիկայում եմ եղել, գիտեք՝ այնտեղ 13 տարեկանից այդ գործերով զբաղվում են դպրոցներում: Ես էլ այդ ուղղությամբ շատ փակ մարդ եմ, մինչև հիմա իմ կյանքում ես մարիխուանա չեմ տեսել, չգիտեմ՝ ինչ է իրենից ներկայացնում, ոնց կարող էի ուշադիր լինել, եթե այդ ճանապարհը չեմ անցել, եթե անցած լինեի, ուշադիր կլինեի, որ իմ երեխան էլ չաներ այդ սխալ գործերը»,- ասաց Վարդանյանը՝ նշելով, որ ուղղակի վրիպում է եղել, ինքը պետք է շատ ավելի ուշադիր լիներ, քան եղել է, բայց մյուս երկու տղաների մոտ նման բան չկա: Կատարվածը նախարարը չարիք որակեց, միաժամանակ նշեց՝ ուրախ է, որ սա բացահայվել է:
