Վերջին օրերին կրկին սրվել են «Իմ քայլը»-ԲՀԿ հարաբերությունները: Ապրիլի 9-ին Նիկոլ Փաշինյանը բավականին կոշտ գնահատական էր հնչեցրել հայտնի «տրանսգենդերային» աղմուկի մեջ ԲՀԿ դերի կապակցությամբ, գործնականում կասկածելով «քաղաքական սադրանքի» համար, որ, ըստ նրա, կազմակերպվել է հեղափոխության և կառավարության դեմ: Ավելի ուշ ՊԵԿ-ը սկսեց հատուկ գործողություն իրականացնել Գագիկ Ծառուկյանին պատկանող «Առինջ մոլում»: Ինչո՞ւ սրվեց իշխանության – ԲՀԿ հարաբերությունը: Արդյո՞ք միայն «տրանսգենդերային» աղմուկի պատճառով, որ առաջացավ ԲՀԿ գլխավորած հանձնաժողովի կազմակերպած լսումների արդյունքում: Թե՞ գործ ունենք այլ իրադրության հետ, երբ խոսքն արդեն ավելի լայն քաղաքական դասավորության մասին է:
Թեմայի շուրջ «Առաջին լրատվական»- ի հետ քննարկմանը մասնակցեցին վերլուծաբան Հակոբ Բադալյանը, «Անտարես» հրատարակչության տնօրեն Արմեն Մարտիրոսյանը և քաղաքագետ Գոռ Մադոյանը:
Հ. Բադալյանի խոսքով՝ իրավիճակն առաջացրել է բազմաթիվ հարցեր. «Մի ելույթից ոչ միայն թեժ պրոցես բռնկվեց ներքին առումով, այլ նաև արտաքին արձագանք եղավ՝ ԵՄ դեսպանների և պատվիրակության հայտարարությունը եղավ: Հարց է առաջանում՝ արդյո՞ք Հայաստանում խնդիրն այդ աստիճանի լայն մասշտաբ է ստացել, որ առաջացել էր ԵՄ արձագանքի անհրաժեշտությունը: Հատկանշական էր ՀՀ արտգործնախարարության պատասխանը, որը համարժեք էր և ինչ-որ տեղ կոշտ. պետք չէր այդ առիթն օգտագործել ՀՀ-ԵՄ հարաբերության մեջ ստվերային հատված ստեղծելու համար: Այս ամեն ինչը հարցեր առաջացնելով՝ բնականաբար տեղ թողնում է որոշակի սադրանքի մասին մտածելու համար, թեև չի բացառվում, որ գործ ունենք իրադարձությունների որոշակի շղթայի հետ, և մեր հասարակության որոշակի մշակութաբանական ընկալումները հաշվի առնելով՝ հասկանալի է, որ այդպիսի ելույթը պետք է արժանանար ոչ միարժեք գնահատականների: Բայց այն, որ այդ ոչ միարժեքությունը գրեթե վայրի դրսևորումներ էր ստանում, դա արդեն խնդիր է»:
«Արտգործնախարարությունը հստակ ասաց, թե որն է մեր պետության դիրքորոշումը,- նշեց Ա. Մարտիրոսյանը: -Մի կողմից՝ ֆեյքահայությանը մեծ տեղ տալը խնդիր է, մյուս կողմից՝ անընդհատ բռնության կոչեր են հնչում՝ այս կողմից, այն կողմից, ինչը վատ է»:
Գ. Մադոյանի դիտարկմամբ՝ վարչապետի կտրուկ արձագանքը կուտակված թեմաների հետևանք էր. «Ենթադրաբար նա մտածել է, որ իր դեմ տեկտոնային շարժումներ կարող են լինել… Շատ էր կուտակվածը, և վարչապետը հասկացավ, որ կարելի է լիցքաթափել դաշտը»:
«Բորբոք կա, և այդ բորբոքը վարչապետն ուղղել էր ինքն իր դեմ, որովհետև մի կողմից՝ ինքը պատասխանատու է, մյուս կողմից՝ սրանք այն քաղաքացիներն են, որոնք Հայաստանը սարսափից, գաղջ մթնոլորտից հանեցին: Բայց հարցերը պետք է լուծել,- ընդգծեց Ա. Մարտիրոսյանը՝ հավելելով, որ կուտակված խնդիրների շարան կա:
Մանրամասն՝ տեսանյութւոմ:
