Երեք տարի առաջ՝ այս օրերին, մեր հանրությունը դեմ առ դեմ կանգնեց պատերազմին, և պարզվեց, որ մեր երկիրը պատրաստ չէր. պատերազմ տեսած երկիրը մոռացել էր պատերազմի վտանգի մասին: «Առաջին լրատվական»- ի հետ զրույցում, անդրադառնալով այս դիտարկմանը, ռեժիսոր Հրանտ Վարդանյանը նշեց. «Մենք միշտ կարծում էինք, որ բանակն այն տեղն է, որտեղ ամեն ինչ արվում է, որ ապահով լինի: Բայց Ապրիլյան պատերազմը մութ անկյուններ ունի: Մենք ունենք բարեկամ, զինակից, ռազմավարական ընկեր երկիր, որն ինչ թուփ շարժվում է այդ տարածքներում, լավ տեղյակ է, բայց մեզ չի հայտնում դրա մասին: Պոստերում պատրաստ չեն եղել, այդ երեխեքը զարմացած էին, որ անօգնական մնացին… Բանակը արագ գործող օրգանիզմ է, պատրաստված լինելու դեպքում վայրկյաններ է տևում, որ գործի անցնի, բայց ինչո՞ւ էր այդքան ուշանում, ու հակառակորդը հասցրեց 800հա տարածք գրավել: Այդ ամենի ֆոկուսնիկները չգիտեմ ովքեր են, բայց եթե դրանց ետևում կան նաև հայ մարդիկ, այս լուսավոր զավակների մահը դրանց վրա է: Զոհաբերելու գնով ոչ ոք հարց լուծելու իրավուքն չունի, պատերազմն ուրիշ բան է, զոհաբերությունը՝ ուրիշ, բայց եթե ինչ-որ մարդիկ գիտեին, որ զոհեր են լինելու, և դա անում էին ինչ-որ բաների համար, դա ոչ թե հայրենիքի դավաճանություն է, այլ հակամարդկային արարք»:
Հրանտ Վարդանյանի դիտարկմամբ՝ այսօր պատերազմների ֆորմուլաները փոխվել են. «Այսօր տնտեսական պատերազմն ավելի զորեղ է, քան զենքով կռիվ անելը, այսօր քարոզչական, գիտատեխնիկական պատերազմներն ավելի զորեղ են, քան զենքով պատերազմները: Զավթողական պատերազմը մի բան է, հայրենիքը պաշտպանելու համար պատերազմն՝ այլ բան: Մենք ուժեղ ենք նրանով, որ մեր կենսական տարածքն ենք պաշտպանում:
«Մեր ազգի, մեր մտավորականության գլուխը 100 տարվա մեջ հինգ անգամ կտրել են, բայց էլի ծիլ ենք տվել: Եվ ապրիլյան պատերազմի հերոսներն այն ծիլերն են, որ ազատ մնալու համար ռումբ են պայթացրել»,- նշեց ռեժիսորը:
Նրա դիտարկմամբ՝ մենք ազատ չէինք, դրա համար էլ մեր հաղթանակը մնաց օդում. «Պատերազմը հաղթել էինք, պետք է կապիտուլյացիա լիներ, բայց Մոսկվան դրդեց «օդ» պայմանագիր ստորագրել… Մոսկվայի հետ պետք է քանդենք մեր հարաբերությունները, նորից կառուցենք: Ռազմավարական գործընկերը փամփուշտ է վաճառում թշնամուն, որ մեր ձագերին սպանեն, այդպիսի ընկեր չի լինում, մենք ինքնախաբեությամբ են զբաղված»:
Մանրամասն՝ տեսանյութում:
