ՀՀ վարչապետ Նիկոլ Փաշինյանի գլխավորած պատվիրակությունը մարտի 28-29-ը կմեկնի Ավստրիայի մայրաքաղաք Վիեննա: Այս մասին տեղեկացավ Էլեկտրոնային կառավարման e-gov.am հարթակում հրապարակված ՀՀ վարչապետի որոշումից՝ Ավստրիա կառավարական պատվիրակություն գործուղելու մասին:
Ավելի վաղ ռուսական լրատվամիջոցները հայտնել էին Ավստրիայի նախագահ Ալեքսանդր վան դեր Բելլենի հետ Փաշինյանի հանդիպման մասին: Տարբեր լրատվամիջոցներ վերջին օրերին նշում են նաև ՀՀ վարչապետի և Ադրբեջանի նախագահ Իլհամ Ալիևի հնարավոր հանդիպման մասին:
Վարչապետի խոսնակ Վլադիմիր Կարապետյանը, սակայն, մարտի 25-ին «Արմենպրես»-ի հետ զրույցում նշեց, որ հնարավոր հանդիպման վերաբերյալ կլինի համաձայնեցված հայտարարություն:
Տարածաշրջան կատարած վերջին այցելությունից հետո՝ մարտի 1-ին իրենց տարածած հայտարարության մեջ ԵԱՀԿ Մինսկի խմբի համանախագահները (Իգոր Պոպովը՝ Ռուսաստան, Ստեֆան Վիսկոնտին՝ Ֆրանսիա և Էնդրյու Շոֆերը՝ ԱՄՆ) ողջունել էին Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի պատրաստակամությունը՝ առաջիկայում հանդիպելու համանախագահների հովանու ներքո: Սա կլինի երկու երկրների ղեկավարների առաջին պաշտոնական հանդիպումը: Իսկ մինչ այդ կայացել է երեք ոչ պաշտոնական հանդիպում՝ Դուշանբեում, Սանկտ Պետերբուրգում և Դավոսում:
