Միացյալ Նահանգների նախագահ Դոնալդ Թրամփը Գոլանի բարձունքները պաշտոնապես ճանաչել է Իսրայելի անքակտելի մաս: Բարձունքները Իսրայելի վերահսկողության ներքո անցել են 1967թ. ՝ արաբա-իսրայելական վեցօրյա պատերազմի ժամանակ: Հատկանշական է, որ և՛ Իսրայելը և’ Սիրիան Գոլանի բարձունքները համարում են իրենց տարածքի մի մասը։ Թեև Իսրայելը բարձունքները հայտարարել է իր տարածք, բայց ՄԱԿ-ը չի ճանաչել այդ որոշումը: Այսպիսով, Թրամփի այս քայլը նոր իրավիճակ է ստեղծում ոչ միայն մերձավորարևելյան տարածաշրջանում, այլև ամբողջ աշխարհում: Թեմայի շուրջ «Առաջին լրատվական»-ը զրուցել է արաբագետներ Արմեն Պետրոսյանի և Սարգիս Գրիգորյանի հետ:
Գրիգորյանի դիտարկմամբ՝ տեղի ունեցածը նոր իրողություն է, որը, անխոս, իր ազդեցությունը կունենա տարածաշրջանում: «Երուսաղեմը մայրաքաղաք ճանաչելը և այնուհետև դեսպանությունն այնտեղ տեղափոխելը, Գոլանի բարձունքների հանդեպ Իսրայելի լիազորությունների վերահաստատումը, կարծում եմ այդ նախանշաններից մեկն է. մենք հիմա գործ ունենք փոփոխվող աշխարհակարգի և իրավակարգի հետ, ինչն առավել ցայտուն երևում է Մերձավոր Արևելքում»,-հավելեց նա:
Պետրոսյանը կարծում է, որ Թրամփի որոշման ազդեցությունը միանգամից չի զգացվելու: «ԱՄՆ-ի ներկա վարչակազմը վարում է առավելապես ամերիկակենտրոն քաղաքականություն և անգամ արտաքին քաղաքականության շրջանակներում ընդունված որոշումները դարձյալ նեղ ամերիկյան շահերի համատեքստում են, տվյալ դեպքում դաշնակիցներին նման աջակցության ցուցաբերումը…Մերձավոր Արևելքը տասնամյակներ շարունակ ԱՄՆ-ի ցանկացած վարչակազմի համար եղել է շահերի գոտի և նման կողմնակալ քաղաքականությամբ Վաշինգտոնն այսօր փաստացի ստեղծում է կողմնակիցների և հակառակորդների շրջանակ, ինչը միանշականորեն ազդելու է տարածաշրջանում ԱՄՆ-ի հետագա քաղաքական գործընթացների վրա»:
Գրիգորյանը չբացառեց Իսրայելի կողմից Գազայի հատվածում ուղիղ ռազմական գործողություններ սկսելու հավանականությունը: «Գազայի հատվածում Իսրայելը 1000 զինվոր է կուտակել, պահեստազորային հավաք է հայտարարվել, կարծես որոշակի կանխարգելիչ միջոցառումներ են տեղի ունենում… շատ հնարավոր է, որ այսպես շարունակվելու կամ իրավիճակի թեժացման դեպքում տեսնենք ցամաքային ռազմական գործողություններ Իսրայելի կողմից»,-հավելեց նա:
Առավել մանրամասն՝ տեսանյութում: