Այսօր առավոտից Ավշար գյուղի հիմնական դպրոցի մանկավարժական խորհուրդը կրթության և գիտության նախարարության հանրակրթության վարչության պետի հետ Արարատի մարզպետարանում մարզպետ Գարիկ Սարգսյանի մոտ քննարկում էին շուրջ 7 օր տևած դասադուլի և մանկավարժների պահանջը։
Ավշարի դպրոցում, հիշեցնենք, մեկ շաբաթ է՝ դասադուլ է։ Ուսուցիչները հրաժարվում են դասարան մտնել և դասապրոցես իրականացնել՝ պահանջելով նորանշանակ տնօրենի հրաժարականը։
Ուսուցիչները պնդում են, որ նոր տնօրենը՝ Հերմինե Անդրեասյանը կոպիտ է իրենց հետ, արհամարհում է, ցանկացել է իրենց փոխտնօրենին ազատել աշխատանքից։
Երեք ժամից ավելի տևած քննարկումից հետո, սակայն, կողմերը ընդհանուր հայտարարի չեկան։ Ուսուցիչները պնդեցին, որ իրենք շարունակելու են իրենց դասադուլն ու գործադուլը մինչև իրենց պահանջը չբավարարվի, ու տնօրենը հրաժարական չտա։
Մարզպետ Գարիկ Սարգսյանն էլ ասաց, որ իրենց ուսուցիչներին հորդորել են գնալ ու նորմալ մասնակցել դասապրոցեսին։ Ծնողներին ևս հորդորել են երեխաներին տանել դպրոց։
Մարզպետը նշեց, որ որոշակի ուղղորդում տեսնում է այս ամենում, քանի որ ինչ-որ մարդիկ են հայտնվում դպրոցում, դպրոցի հետ կապ չունեցող, սկսում են սպառնալ տնօրենին։ «Մենք հանդիպման ժամանակ ուզում էինք հասկանալ իրենց պահանջի իրավական կողմը։ Ինչ հիմքով են իրենք պահանջում տնօրենի հրաժարականը։ Տնօրենը օրինական ճանապարհով ընտրված տնօրեն է, դեռ մեկ շաբաթ է ինչ աշխատում է։ Բայց հանդիպմանը մասնակիցներից ոչ մեկ որևէ իրավական հիմք մատնացույց չարեց»,- ասաց մարզպետը։
Հանրակրթության վարչության պետ Աշոտ Արշակյանը ևս նշեց, որ հարցի իրավական հիմքերն իրենց համար հասկանալի չեն, և մանկավարժները որևէ հիմնավոր պատճառաբանություն չեն նշել, թե ինչու չեն ցանկանում աշխատել նոր տնօրենի հետ։
Ավշարի դպրոց մեր այցելության պահին որևէ երեխա չկար, դպրոցում միայն սպասարկող անձնակազմի մի քանի աշխատակից էր։ Բակում բարձր դասարանի մի քանի տղաներ էին, ովքեր հրաժարվեցին տեսախցիկի առաջ խոսել և ասել, թե ինչի համար են դասադուլ անում, իրենք ինչ խնդիր ունեն տնօրենի հետ։ Նրանք միայն ասացին, որ ոչ ոք իրենց չի հորդորում դասադուլ անել, քանի որ «ոչ ոք չի կարող իրենց ասել, թե ինչ անեն»։
Առավել մանրամասն՝ տեսանյութում։
