«Առաջին լրատվական»-ի հետ զրույցում անդրադառնալով վարչապետ Ն. Փաշինյանի այսօրվա մամուլի ասուլիսին՝ «Մեկ Հայաստան» կուսակցության համահիմնադիր Արթուր Ղազինյանը նշեց, որ այն իր ձևաչափով բաց էր և նման ՌԴ նախագահի տարեկան ամփոփիչ ասուլիսին, իսկ բովանդակային առումով նպատակ ուներ հավասարակշռելու դիրքերը քարոզչական պատերազմում. «Ակնհայտ է, որ իշխանությունը քարոզչական պատերազմում արդեն զիջում էր իր հակառակորդներին: Իշխանության երկրորդ և երրորդ շերտերում չեն կարողանում մարտավարական պայքար վարել քարոզչական պատերազմում՝ ուղենիշեր չլինելու պատճառով»: «Հայաստանում գրաքննություն չկա, խոսքի ազատություն է, մամուլն ազատ է՝ երբեմն չափից ավելի ազատ, նույնիսկ անպատասխանատվության աստիճանի ազատ»,- նշեց մեր զրուցակիցը՝ հավելելով, որ չարաշահվում է իրավիճակը՝ խոսում են՝ առանց իրենց հաշիվ տալու:
Հարցին, թե արդյոք պետք է, որ ստեղծվի հակակոռուպցիոն նոր մարմին, Ա. Ղազինյանը պատասխանեց. «Իհարկե պետք է, հատուկ օրենք պետք է մշակվի կոռուպցիայի դեմ պայքարի մասին, օրենքով ստեղծված մարմնին պետք է տալ լիազորություններ. այն պետք է ունենա կոռուպցիոն երևույթները բացահայտելու, հետաքննելու և դրանք իրավապահ մարմիններին հանձնելու իրավասություն»:
Հարցին, թե այդ մարմինը գողացածը վերադարձնելուն կարո՞ղ է օգնել, Ղազինյանը պատասխանեց, որ նախ մեղադրական դատական ակտով պետք է ապացուցել՝ գույքը գողացված է, թե ոչ. «Սահմանադրությունը երաշխավորում է անմեղության կանխավարկածը, շեղում հնարավոր չէ թույլ տալ, բացառությամբ միջազգային բնույթի հանցագործությունների դեպքում՝ ահաբեկչություններ, թրաֆիկինգ, փողերի լվացում, թմրամիջոցների վաճառք և այլն, որոնց դեպքում նույնպես անհրաժեշտ է, որ լինի այդ փաստն ապացուցող մեղադրական դատական ակտ, իսկ եթե մերձավոր ազգականի կողմից հաստատված է հանցավոր գործունեության մեջ նշված անձի ներգրավված լինելու հանգամանքը, այդ դեպքում մեղադրական ակտի անհրաժեշտություն չկա…
Գնալ գործարքի ենթադրյալ իրավախախտի հետ, ասելով գույքը վերադարձրու և պատասխանատվությունից կազատվես, նշանակում է կամայական մոտեցում ցուցաբերել, ինչն անթույլատրելի է, պետք է գործել օրենքի գերակայությամբ»:
Անդրադառնալով դիտարկմանը, որ առանց մեղադրական դատավճռի հանցավոր ճանապարհով ստացված գույքի բռնագանձման մեխանիզմը կիրառվում է միջազգային պրակտիկայում, Ա. Ղազինյանը նշեց, որ այս մեխանիզմի կիրառումը Հայաստանը եռակի ռիսկային է դարձնում. «Ինձ հետաքրքրում է Հայասատնի տնտեսական կայունությունը, դատական համակարգի նկատմամբ վստահությունը և ներդրումների առումով գրավչությունը… Ներդրողը ուսումնասիրում է պետության մոտեցումը սեփականության իրավունքի պաշտպանությանը. Հայաստանն այդ առումով ռիսկային է և ավելի ռիսկային է դառնում Լեռնային Ղարաբաղի չկարգավորված հակամարտության պատճառով, և եռակի ավելի ռիսկային է դառնում, երբ ներդրողը տեսնում է, որ այս երկրում սեփականատերը կարող է իր մի քանի միլիոն դոլար արժեցող գույքը նվիրել պետությանը. դա նշանակում է, որ պետությունը միջամտել է, մինչդեռ շուկայական տնտեսությունը հիմնված է սեփականության իրավունքի անձեռնմխելիության սկզբունքի վրա»:
Մանրամասն՝ տեսանյութում:
