Արցախում Նիկոլ Փաշինյանի հայտարարությունը հենց Արցախը բանակցային սեղան վերադարձնելուն ուղղված աշխատանքի մի մասն է: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Միքայել Զոլյանը:
Նա նկատեց, որ այդ աշխատանքը երեկ չի սկսվել, Նիկոլ Փաշինյանի վարչապետ ընտրվելու հենց հաջորդ օրը՝ մայիսի 9-ին, նա այցելել է Արցախ և բարձրացրել այդ հարցը:
«Դրանից առաջ էլ, ընդդիմության մեջ լինելով, նա այդ հարցը բարձրացնում էր: Իհարկե, նրա ելույթն աննախադեպ էր, որովհետև Արցախում առաջին անգամ միանգամից բոլոր փաստարկները հանրային, բաց կերպով շարադրվեցին: Բայց ընդհանուր առմամբ, այդ ուղղությունը նորություն չէ:
Այս ամենի մասին մենք վաղուց ենք խոսում: Ելույթը կարևոր էր, որ առաջին անգամ բաց, հանրային, միջազգային լրատվամիջոցների համար ընկալելի կերպով բերվեց այդ փաստարկը, որ Արցախի քաղաքացիները պետք է ունենան իրենց ներկայացուցիչը բանակցությունների ընթացքում»,- ընդգծեց Զոլյանը:
Նա հավելեց, որ սա նախապայման չէ. «Մենք չենք ասում՝ մենք չենք բանակցի, քանի դեռ Արցախը չի մասնակցում: Մենք ասում ենք՝ մենք կարող ենք բանակցել Հայաստանի Հանրապետության անունից և ՀՀ շահերը կարող ենք ներկայացնել, բայց չենք կարող մեզ վրա վերցնել Արցախի անունից խոսելու գործառույթը»:
