Ադրբեջանական APA լրատվական գործակալության փոխանցմամբ՝ ռուսական Вестник Кавказа տեղեկատվական-լրատվական գործակալության գլխավոր խմբագիր Ալեքսեյ Վլասովն այսօր կայացած մամլո ասուլիսի ժամանակ անդրադարձ է կատարել ղարաբաղյան հակամարտության կարգավորմանը.
«Ես համաձայն չեմ այն կարծիքի հետ, թե Կազանի հանդիպումը ձախողված է։ Այդ հանդիպումը ղարաբաղյան բանակցային գործընթացի հերթական փուլն էր։ Կազանում արդյունքի գրանցման բացակայությունն առաջին հերթին պայմանավորված է նրանով, որ Հայաստանն ու Ադրբեջանը դեռևս պահպանում են իրենց տարաձայնությունները։ Երևանն առաջին հերթին պնդում է Լեռնային Ղարաբաղի կարգավիճակի հստակեցման վրա, իսկ Բաքուն՝ «օկուպացված» տարածքներից հայկական զորքերի դուրսբերման։
Ես նաև համաձայն չեմ այն տեսակետի հետ, թե Ռուսաստանը շահագրգռված է ղարաբաղյան հակամարտությունը սառեցված վիճակում պահելով։ Ղարաբաղյան հակամարտության չկարգավորված լինելը բացասականորեն է ազդում Հյուսիսային Կովկասի և Ռուսաստանի հարավի կայունության վրա։ Դրա համար էլ Ռուսաստանը շահագրգռված է հակամարտության կարգավորմամբ։ Կարծում եմ, որ մինչև 2012 թվականի ամառ Ղարաբաղի վերաբերյալ կարող է կնքվել որոշակի համաձայնագիր։
Ղարաբաղյան հակամարտության կարգավորման գործընթացում միջնորդական գործունեությունից Մոսկվայի հրաժարվելու մասին լուրերը միտումնավոր են տարածվել։ Այդ տեղեկատվությունն անհիմն է։ Այդպիսի լուրերի տարածմամբ շահագրգռված են այն կողմերը, ովքեր մտադիր են իրենց ձեռքում կենտրոնացնել խաղաղապահ առաքելությունը։ Ներկայումս ընթանում է տեղեկատվական պայքար, և վերջին հայտարարությունները բացատրվում են հենց դրանով։ Սակայն խնդրի լուծման հարցում Ռուսաստանի դերը կլինի վճռորոշ»։
