Սպառողների իրավունքների պաշտպանության ՀԿ-ն «Ֆրիդրիխ Էբերտ» հիմնադրամի աջակցությամբ նախաձեռնել է ապրանքների ընդհանուր անվտանգության մասին ՀՀ օրենքի նախագծի մշակումը, որի հիմնական նպատակը Հայաստանում սպառողների առողջության և անվտանգության բարձր մակարդակ ապահովող օրենսդական դաշտի ստեղծումն է: Նախագիծը ներկայացվել է ՀՀ էկոնոմիկայի նախարարություն, որտեղից ստացվել է դրական արձագանք։
Այս մասին այսօր հրավիրված մամուլի ասուլիսի ընթացքում տեղեկացրեց Սպառողների իրավունքների պաշտպանության նախագահ Լուսինե Յագուտյանը:
ՀԿ-ի փորձագետ Վիկտոր Աբրահամյանն ավելացրեց, որ, մեկ այլ նախաձեռնությամբ, իրենք հետամուտ են լինելու Հայաստանում մսի և մսամթերքի վիճակի բարելավմանը, իսկ այս անվտանգության ոլորտում Սովետական միության փլուզումից հետո, երբ արտադրամասերը փլուզվեցին, առկա խնդիրները շատացել են, մասնավորապես՝ կենդանիների վերամշակման ձեռնարկությունների՝ սպանդանոցի, սպանդանոցային կետի և այլնի բացակայություն, մսի և մսամթերքի ոչ հիգիենիկ տեղափոխում, օրենսդրության ոչ լիակատար կիրառում և այլն։ Ըստ փորձագետի կենդանիների վերամշակման ոչ մի ձեռնարկություն չի գործում, ինչը հասկանալի է այն առումով, որ ձեռնարկություն աշխատեցնելու համար օրական 4-5 հազար անասուն պետք է մորթվի, ինչը մեր պայմաններում իրատեսական չէ, սակայն ձեռնարկությունների բացակայության պատճառով համատարած բակային սպանդ է իրականացվում, և գրեթե բացակայում է կենդանիների ու նրանց սպանդից ստացված մթերքի անասնաբուժական սանիտարական հսկողությունը, այնինչ, եթե սպանդանոցներ գործեին, կենդանիների արյունը կարող էր օգտագործվել և որպես անասնակեր, և որպես դեղամիջոց, ինչպես նաև սննդի մեջ: Փորձագետի խոսքերով, նախատեսվել է Հայաստանում կառուցել մոտ 10 սպանդանոց, ինչը, ըստ ՀՀ գյուղնախարարության սննդի անվտանգության պետկան ծառայության տեղեկատվության և հասարկայնության բաժնի պետ Բաբկեն Պիպոյանի, մեր սպառողների մոտ կձևավորվի ճիշտ պահանջատիրոջ հոգեբանություն, հակառակ դեպքում սպառողները մարդ սպանողին համարում են հանցագործ, իսկ վտանգավոր միս վաճառողին՝ ոչ: Նա հիշեցրեց, որ վերջին ուսումնասիրություններն իրականացրել են ԳՈՒՄ-ի և Նոր Նորքի մսի շուկայում, սպասում են կառավարության թույլտվությանը, որից հետո կանցնեն մարզեր:
Հիշեցնենք՝ առաջին խախտման դեպքում մսավաճառները տուգանվում են 50 հազար դրամով, երկրորդի դեպքում՝ մինչև 300 հազար դրամով, իսկ երրորդ անգամ արդեն քրեական գործ է հարուցվում:
