«Ինձ թվում է՝ առայժմ Հայաստանին որևէ կոնկրետ բան առաջարկված չէ, շատ ընդհանուր գծերով են ներկայացված կետերը՝ կապված Եվրամիություն-Հայաստան հարաբերությունների հետ: Ուղղակի Հայաստանը չէր կարող չնշվել, երբ առաջարկվում է փաստաթուղթ Արևելյան գործընկերության հետ, բայց ես առայժմ այնտեղ կոնկրետ հեռանկարներ չեն տեսնում»,- «Առաջին լրատվական»-ի հետ զրույցում ասաց Արևելյան գործընկերության Քաղաքացիական հասարակության ֆորումի ազգային համակարգող Բորիս Նավասարդյանը:
Հիշեցնենք, որ Եվրամիության անդամ 13 երկրները մշակել են Արևելյան գործընկերության ծրագրում ընդգրկված պետությունների հետ համագործակցության շարունակականությանն ուղղված գործողությունների ծրագիր: Այն Հայաստանում ստացել է «Եվրոպական փաթեթ» անվանումը: Փաստաթուղթը բաղկացած է կետերից, որոնք հաստատվել են 2014թ. փետրվարի 6-ին և քննարկվել փետրվարի 10-ին՝ Եվրոպական միության խորհրդի նիստում: «Եվրոպական փաթեթն» առայժմ պաշտոնապես հրապարակված չէ:
Այդուհանդերձ՝ Բորիս Նավասարդյանին խնդրեցինք մեկնաբանել, թե ի՞նչ տպավորություն է ստացել փաստաթղթի աշխատանքային տարբերակին ծանոթանալուց հետո: Նախորդ փաստաթղթում անվտանգության բաղադրիչի վերաբերյալ որևէ կետ չկար, իսկ այս մեկում արդեն այս մասին որոշակի դրույթներ կան՝ սա ինչի՞ մասին է վկայում հարցին ի պատասխան՝ Նավասարդյանն ասաց. «Դժվարանում եմ ասել, թե դա ինչ կարող է նշանակել, բայց քանի որ բարեփոխումների իրականացման, ինտեգրացիայի ուղղությամբ հարաբերությունների զարգացման հեռանկարները շատ մշուշոտ են և անորոշ, չի բացառվում, որ Եվրամիությունը մեր տարածաշրջանում մեծ ուշադրություն դարձնի ղարաբաղյան խնդրին և Հայաստան-Ադրբեջան հարաբերություններին»:
Մեր զրուցակցից հետաքրքրվեցինք նաև, թե կոնկրետ Հայաստանը հնարավորություն կունենա՞ Ռուսաստանի հետ սկսել հանգամանալից և անկեղծ երկխոսություն Եվրոպային ինտեգրվելու հարցերի շուրջ, ինչպես նշված է փաստաթղթի կետերից մեկում, և արդյոք Հայաստանին թույլ կտրվի՞ Մաքսային միությունից զատ՝ որևէ այլ բանակցություն վարել:
«Քանի որ Ռուսաստանը, Մաքսային միությունում որպես առաջատար երկիր, ամեն դեպքում բանակցում է Եվրամիության հետ, և քանի որ արդեն հայտարարվել է, որ Հայաստանի անունից Մաքսային միությունն է բանակցություններ վարում Եվրամիության հետ, հետագայում երբ ձևավորվի Եվրասիական տնտեսական միությունը, Եվրամիության հետ հարաբերություններում քաղաքական հարցերով մեզ դարձյալ կներկայացնի Ռուսաստանը: Սա նշանակում է, որ հենց Ռուսաստանն է ներկայացնելու Հայաստանի բոլոր հեռանկարները: Իսկ Հայաստանը պետք է արդեն Ռուսաստանի հետ երկխոսի, ինչպես և նշված է փաստաթղթում»,- եզրափակեց նա:
