ԲՀԿ-ական պատգամավոր Մարտուն Գրիգորյանի համար ԲՀԿ-ի քաղաքական կողմնորոշումը լիարժեք պարզ է, և նա ԲՀԿ համագումարին որևէ չհստակեցված հարց չուներ. «Ես չեմ հասկանում, թե ինչը մեզ համար մինչ օրս պարզ չէր, որ այս համագումարին պետք է հստակեցվեր: Մենք այլընտրանքային ուժ ենք, որի մասին մշտապես ասվել է, և մենք մշտապես ցույց ենք տվել, թե ինչ է նշանակում այլընտրանք և ինչպես պետք է աշխատի այլընտրանքային քաղաքական ուժը»:
Հարցին,թե այլընտրանք նշանակո՞ւմ է քննադատել կառավարությանը, բայց ոչ Սերժ Սարգսյանին՝ ԲՀԿ-ական պատգամավորը պատասխանեց. «Երկրում ինչ հարցեր, ինչ խնդիրներ որ կան, մենք բարձրաձայնում ենք այդ խնդիրների մասին, խոսում ենք այդ խնդիրների մասին, իսկ մնացածը՝ թե այդ խնդիրներն ում են վերաբերում, ում չեն վերաբերում, այդ հարցերով դիմեք Նաիրա Զոհրաբյանին»:
Իսկ այն հարցին, թե ինքը պահանջո՞ւմ է կառավության հրաժարականը, ԲՀԿ-ական պատգամավորը ևս խուսափողական պատասխան տվեց. «Ճիշտն ասած՝ այդ մասին էս նիստի ժամանակ ինչ-որ քննարկում չի եղել: Երբ որ կուսակցության որոշումը հստակ եղավ՝ մենք, բնականաբար, արդեն այդ հարցի պատասխանը կտանք: Էս պահի դրությամբ ոչ մի ինֆորմացիա չկա»:
Մարտուն Գրիգորյանից հետաքրքրվեցինք նաև Գյումրիում տեղի ունեցող վերջին դեպքերից, մասնավորապես՝ քաղաքապետ Սամվել Բալասանյանի տան վրա նախկին քաղաքապետի որդու իրականացրած հարձակումից: Գրիգորյանին հարցրեցինք, թե ինչպես է գնահատում այդ արարքը, և ինչու իրենք որևէ ձևով չեն աջակցում իրենց կուսակից քաղաքապետին: «Ոչ մի բան էլ չի եղել, ինչ է եղե՞լ որ Գյումրիում: Ամեն ինչ հանգիստ է, խաղաղ: Ինչ է եղե՞լ որ:
– Վարդան Ղուկասյանի որդին հարձակվել է քաղաքապետի տան վրա, կրակոցներ են հնչել: Ինչպե՞ս եք վերաբերում նմանատիպ երևույթներին, և որպես տարածքից ընտրված պատգամավոր՝ չե՞ք փորձել հասկանալ կատարվածի պատճառը:
-Ես չեմ ուզում այդ մասին խոսել:
– Հիմա ինչպե՞ս են ձեր հարաբերությունները Սամվել Բալասանյանի հետ:
– Շատ լավ: Մենք, երբ որ պետք է լինում, աշխատանքային կամ անձնական հանդիպումներ ենք ունենում, մենք իրար հանդիպում ենք և քննարկում ենք ցանկացած հարց:
– Այսինքն այլևս լարված չե՞ն քաղաքապետի հետ ձեր հարաբերությունները:
– Ո՞վ է ասում, որ լարված են: Չկա նման բան: Եթե քաղաքապետ դառնալու հետ կապված եք ասում, ժամանակին ես այդ հարցերի պատասխանը բոլորը տվել եմ: Հիմա մեր հարաբերությունները շատ լավ են: Որպես քաղաքապետ և որպես պատգամավոր՝ մենք պատրաստ ենք մեկս մյուսին լրացնել: Եթե խնդիրներ կան ԱԺ-ում քաղաքի խնդիրները բարձրացնելու համար, ես, որպես պատգամավոր, պատրաստ եմ դա անել: Քաղաքապետն էլ, բնականաբար, պատրաստ է լսել պատգամավորի ներկայացրած խնդիրները և իր ուժերի ներածին չափով լուծումներ տալ:
– Իսկ Ղուկասյաններ հետ հիմա ինչպե՞ս են հարաբերությունները:
– Ղուկասյաններին չեմ ուզում անդրադառնալ ընդհանրապես: