Օրերս ՀՀ Ազգային ժողովը 88 կողմ և 40 դեմ ձայնով հավանություն տվեց կառավարության գործունեության հնգամյա ծրագրին, իսկ այսօր վարչապետ Փաշինյանը, կառավարության նիստը բացելով, ներկայացրեց տնտեսական հեղափոխությունն իրականություն դարձնելու ուղղությամբ արվելիք 15 քայլերը։ Ձեր գնահատմամբ՝ ո՞րն է հանրությանը պարզ այդ բանաձևը, որը մասնագիտական, փորձագիտական տարբեր շրջանակներին, կարծես թե, պարզ չէ, քանի որ նրանք շարունակում են սուր քննադատություններով հանդես գալ «Առաջին լրատվական»-ի հարցին ԱԺ «Իմ քայլը» խմբակցության պատգամավոր Գևորգ Պապոյանը պատասխանեց․ «Մեխանիզմը շատ պարզ է, և որ ամենակարևորն է՝ փորձություն անցած և ապացուցված։ Մենք այդ պատասխանատվությունը չպիտի դնենք դրսի կամ ներսի մեկ հոգու վրա, այլ ՀՀ յուրաքանչյուր քաղաքացի իր մասնաբաժինը պետք է վերցնի և իրականացնի այդ փոփոխությունը։ Հիմա ինչո՞ւ է դա ապացուցված։ Ապացուցված է քաղաքական հեղափոխությամբ, ինչն իրականացրել է Հայաստանի քաղաքացին։ Մեկ տարի առաջ, երբ այս հարցը հնչեր, մենք նորից կխոսեինք սրա մասին, բայց ապացույց չէինք ունենա։ ՀՀ քաղաքացին, որին տարիներ շարունակ նսեմացրել են և ասել են, որ նա ոչինչ չի կարող անել, մենք հիմա ասում ենք՝ ՀՀ քաղաքացին ամենակարող է, նա իրականացրել է քաղաքական հեղափոխություն, որին ոչ ոք չէր հավատում, և ՀՀ քաղաքացին իրականացնելու է տնտեսական հեղափոխության իր մասնաբաժինը»։
Իսկ հանրային ֆինանսների կառավարման մասնագետ Հովհաննես Ավետիսյանն էլ հավելեց․ «Նախ՝ ծրագիր ասելով՝ ինչ ենք հասկանում, որովհետև այստեղ ակնկալիքների ու սպասելիքների մասին նախ պետք է խոսել։ Այն, ինչ ներկայացվում է, իհարկե, ես դեմ չեմ դրան, բայց կարծում եմ՝ ծրագիրը դրա մասին չպիտի լինի; Ինչո՞ւ։ Սահմանադրության 152-րդ հոդվածն ասում է, որ վարչապետը ծրագրով որոշում է քաղաքականությունների հիմնական ուղղությունները։ Այսինքն՝ ծրագրում հիմնարար ինչ-որ դրույթներ պետք է լինեն։ Բայց, այնուամենայնիվ, ի՞նչ է ծրագիրը․ դա փաստաթուղթ է, որով ասում է, որ կառավարությունը անելու է ինչ-որ գործողություններ, և պարտավոր է հանրությանը մանրամասն ներկայացնել, թե ինչ գործողություններ է անում և ինչի համար է անում։ Գործողությունների ծրագիրը գալիս է մանրամասնելու այդ ամեն ինչը, որը ինձ համար պարզ չէ»։
Մանրամասները՝ տեսանյութում։
