Այսօր ամփոփվեցին «Beeline Scholarship» ծրագրի արդյունքները, ըստ որի՝ ՀՀ պետական բուհերում վճարովի համակարգում սովորող 95 ուսանող առաջին անգամ արժանացավ «Beeline Scholarship» կրթաթոշակին: «ԱրմենՏել» ընկերությունը 2014-ին կվճարի 95 ուսանողի մեկ կիսամյակի վարձը:
«ԱրմենՏել» ընկերության գլխավոր տնօրենի առաջին տեղակալ Մերուժան Միքայելյանի խոսքով՝ նույնիսկ ամենազարգացած տնտեսություն ունեցող երկրներում պետությունը չի կարող հասարակության առջև ծառացած բոլոր խնդիրներին լուծում տալ կամ ֆինանսավորել դրանք:
Նա նշեց, որ որևէ առևտրային կազմակերպության հիմքում ընկած է շահույթ ստանալը, որը ստացվում է հասարակությունից: Այսինքն՝ տվյալ կազմակերպությունը իր շահույթի որոշակի մաս պետք է կարողանա կիսել հասարակության հետ:
Բրիտանական խորհրդի հայաստանյան մասնաճյուղի տնօրեն Արևիկ Սարիբեկյանը նշեց, որ այս ամիսների ընթացքում 568 հայտ են ստանցել ուսանողներից: Մասնակցել են բոլոր բուհերը:
Նա նշեց, թե որոնք են եղել չափանիշները, որոնցով հաղթող են ճանաչվել ուսանողները: Առաջին՝ ուշադրություն է դարձվել բովանդակությանը, թե որքանով է այն արդիական, նորարարական և իրատեսական, ապա թե՝ որքանով է ուսանողը ստեղծագործաբար մոտեցել, գնահատվել է նաև հաղորդակցական մոտեցումը:
Առաջին փուլում ներկայացվել են հայտերը, որոնցից 178 ուսանող ընտրվել է հարցազրույցի համար, այնուհետև նրանցից 95-ը հաղթող է ճանաչվել, ընդ որում՝ 7-ը մարզերի բուհերից:
Արևիկ Սարիբեկյանի խոսքով՝ հաղթողների 70 տոկոսը աղջիկներ են: Նա հավելեց, որ մեր ապագան հուսալի ձեռքերում է: Հաղթող ճանաչված բուհերի ուսանողների մեջ առաջին հորիզոնականում ԵՊՀ-ն է՝ մոտ 30 տոկոս, ապա տնտեսագիտական համալսարանը՝ մոտ 12 տոկոս: Մրցույթում հաղթած ուսանողները կստանան կրթաթոշակ:
Լուսանկարը` PAN Photo-ի
