Ուկրաինացիների ավելի քան մեկ քառորդը (26,9 տոկոս), որոնք նախագահական ընտրություններում մասնակցելու են քվեարկությանը, մտադիր է պաշտպանել շոումեն Վլադիմիր Զելենսկուն. վարկանիշում նրան հաջորդում են պետության ներկայիս ղեկավար Պյոտր Պորոշենկոն (17,7 տոկոս) և «Բատկիվշչինա» կուսակցության առաջնորդ Յուլյա Տիմոշենկոն (15,8 տոկոս):
Այդ մասին վկայում են Կիևի սոցիոլոգիայի միջազգային ինստիտուտի (ԿՍՄԻ) կողմից 2019 թվականի հունվարի 31-ից մինչև փետրվարի 10-ն անցկացված հարցման արդյունքները, որոնք հրապարակվել են փետրվարի 14-ին «Ինտերֆաքս» գործակալությունում կայացած մամուլի ասուլիսում: 2018 թվականի դեկտեմբերին ԿՍՄԻ-ի կատարած հարցումը ցույց էր տվել, որ 11,9 տոկոսը (21,2 տոկոսը նրանց, ովքեր արդեն որոշել են, թե ում են ընտրելու) կքվեարկեր Յուլյա Տիմոշենկոյի օգտին, 8,2 տոկոսը (14,6 տոկոս)՝ Վլադիմիր Զելենսկու, 6,5 տոկոսը (11,6 տոկոս)՝ Պյոտր Պորոշենկոյի օգտին:
Հունվարի վերջին Զելենսկին, հարցումների համաձայն, դարձել է նախագահական ընտրարշավի առաջատարը:
