Հայտնի է, որ «Բարգավաճ Հայաստան» կուսակցությունը Հանրապետական կուսակցության հետ միասին Ազգային ժողովում ունի մեծ թվով գործարարներ: Նրանցից ոմանք ահռելի հարստության տեր են: Իհարկե, այս դեպքում խոսքը ԲՀԿ ղեկավար Գագիկ Ծառուկյանին չի վերաբերում: Նրա հարստությունը կարելի է համեմատել Հայաստանի հնարավորությունների հետ, նրա ֆինանսները կլինեն ՀՀ պետական բյուջեի չափ, եթե ոչ՝ ավելի: Դրանք այնքան շատ են, որ առայժմ մեր ժամանակը չի ներում անդրադառնալ դրանց: Այդ պատճառով էլ այս անգամ մենք կանդրադառնանք ԲՀԿ մեկ այլ գործարար և հարուստ պատգամավորի՝ Գյումրիի թիվ 34 ընտրատարածքից մեծամասնական ընտրակարգով ընտրված Մարտուն Գրիգորյանի ունեցվածքին:
Նշենք, որ բարձրաստիճան բոլոր պաշտոնյաներն արդեն էթիկայի հանձնաժողով են ներկայացրել իրենց գույքին ու եկամուտներին վերաբերող հայտարարագրեր, քանի որ դրա վերջնաժամկետը փետրվարի 15-ն է:
Եվ այսպես՝ Մ. Գրիգորյանն այս տարի հայտարարագրել է երեք անշարժ գույք և երկու շարժական գույք՝ հավանաբար մեքենաներ: Պատգամավորը որոշակի բաժնետոմսեր ունի նաև ինչ-որ ընկերությունում: Բայց ինչպես անշարժ ու շարժական գույքի, այնպես էլ այս բաժնետոմսերի դեպքում նույնպես թաքցրած է տեղեկատվությունը, թե դրանք ինչ են իրենցից ներկայացնում՝ բնակարա՞ն են, թե՞ արտադրական օբյեկտ, մեքենաներն ի՞նչ մակնիշի են, ի՞նչ արժեն և այլն: Ընդամենը քանակն է նշված:
Հետևաբար անհասկանալի է, թե որն է այդ հայտարարագրերը ներկայացնելու իմաստը, եթե դրանք հրապարակային չեն: Մինչդեռ իշխանություններն առիթը բաց չեն թողնում՝ հայտարարելու, որ բարձրաստիճան պաշտոնյաների գույքն ու եկամուտն ամբողջապես հայտարարագրվում են, այն հրապարակային է, և հասարակությունն ու լրատվամիջոցները կարող են ծանոթանալ դրանց:
Հայտարարագրերում բաց են հիմնականում դրամական միջոցներին վերաբերող տեղեկությունները: Մ. Գրիգորյանն այս բաժնում հայտարարագրել է 170 մլն դրամ և 20.000 դոլար: Մ. Գրիգորյանի կնոջ՝ Ազնիվ Գրիգորյանի հայտարարագրում նույնպես նշված է երեք անշարժ գույք և չորս օբյեկտներում որոշակի բաժնետոմսեր: Այս դեպքում նույնպես տեղեկատվությունը փակ է: Պատգամավորի կինը նույնպես չափազանց հարուստ է, դրամական միջոցների բաժնում հայտարարագրել է 132 մլն դրամ և 15.000 դոլար:
Պակաս հարուստ չեն նաև պատգամավորի ծնողները: Հայրը՝ Կամո Գրիգորյանը, հայտարարագրել է մեկ շարժական գույք, 138 մլն դրամ և 20.000 դոլար: Մայրը՝ Ջեմմա Գրիգորյանը, նույնպես ունի մեկ անշարժ գույք, չորս օբյեկտներում արժեթղթեր և ներդրումներ, որոնց չափը թաքցրած է, իսկ դրամական միջոցների բաժնում՝ 125 մլն դրամ և 20.000 դոլար:
Այսպիսով՝ Մ. Գրիգորյանն ու իր կինը հայտարարագրի միայն դրամական միջոցների բաժնում ունեն 302 մլն դրամ և 35.000 դոլար, իսկ պատգամավորի ծնողները՝ 163 մլն դրամ և 40.000 դոլար:
Հիշեցնենք նաև, որ Մ. Գրիգորյանը Գյումրիում համարվում է «գողական» աշխարհում կապեր, վերահսկողություն և հեղինակություն վայելող մարդ: Նրա անունը երբեմն կապվում է աղմկոտ իրադարձությունների՝ կրակոցների, սպանությունների ու վրեժխնդրությունների հետ: Համանման համբավ ունի նաև նրա հայրը: Հիշեցնենք նաև, որ անցած տարի նախագահական ընտրությունների քարոզարշավի ժամանակ, երբ Սերժ Սարգսյանը Գյումրի էր ժամանել, և Շիրակի մարզի քաղաքական դեմքերը նրա պատվին ճաշկերույթ էին կազմակերպել, այդ միջոցառմանը ներկա էր նաև Մ. Գրիգորյանը:
