Հայաստանի Հանրապետության և Կիպրոսի Հանրապետության միջև պաշտպանական համագործակցությունն ընդլայնվել է՝ ներառելով նախկին 13-ի փոխարեն 15 ոլորտ:
ՀՀ ՊՆ վարչական համալիրի մամուլի սրահում տեղի ունեցած Կիպրոսի Հանրապետության պաշտպանության նախարար Սավաս Անգելդիսի համատեղ մամուլի ասուլիսում այս մասին հայտնեց Հայաստանի Հանրապետության Պաշտպանության նախարար Դավիթ Տոնոյանը՝ նշելով, որ Հայ-կիպրական երկկողմ պատմական համագործակցությունը հիմնված է երկու երկրների ժողովուրդների երկարամյա բարեկամության, փոխադարձ պատրասատակամության և ընդհանուր մոտեցումների վրա, որն ունի լուրջ հեռանկարներ:
«Մենք Կիպրոսի Հանրապետության պաշտպանության նախարար Սավաս Անգելդիսի հետ քննարկել ենք պաշտպանության բնագավառում առկա վիճակն ու ընդլայնման հնարավորությունը: Տեղեկացնեմ ձեզ, որ անմիջապես տեղում մեր 13 համագործակցության միջոցառումները դարձան 15:
Ներկայացրել եմ Սիրիայում Հայաստանի մարդասիրական առաքելության մանրամասները և գտնում ենք, որ տեղեկատվության փոխանակումը Մերձավոր Արևելքում շատ կարևոր է երկուստեք»,- ասաց Տոնոյանը:
Պաշտպանության նախարարը նշեց, որ հանդիպման ընթացքում քննարկվել են ժամկետային պարտադիր ծառայության կազմակերպման հետ կապված խնդիրները:
«Ինչպես գիտեք, Կիպրոսի Հանրապետությունը Եվրամիության անդամ երկրների մեջ քչերից մեկն է, որը պահպանում է ժամկետային պարտադիր ծառայությունը և, ի ուրախություն մեզ, ունի մեզ հետ փորձի փոխանակման մեծ հնարավորություններ, քանի որ կիսում են պարտադիր ժամկետային ծառայության բոլոր դժվարությունները: Եվ պայմանավորվել ենք, որպես առաջնահերթություն, տեղեկատվություն փոխանակել իրար հետ»,- հավելեց Տոնոյանը:
Նախարարն ասաց, որ Կիպրոսի հետ համագործակցելու են ռազմաօդային, հակաօդային, մարտական պատրաստվածության, ռազմական արդյունաբերության ոլորտում, ռազմատեխնիկական և այլ ոլորտներում:
«Մեր հանդիպման ընթացքում կրկին անգամ փաստեցինք բարեկամ երկրների միջև առկա քաղաքական բարձր մակարդակի հարաբերությունները և վերահաստատեցինք միջազգային ու տարածաշրջանային անվտանգության հարցերի շուրջ ընդհանուր մոտեցումները»,- եզրափակեց Տոնոյանը:
Կիպրոսի Հանրապետության պաշտպանության նախարար Սավաս Անգելդիսը հրավերի համար շնորհակալություն հայտնեց Տոնոյանին և նշեց, որ մեծ ուրախությամբ է այցելել Հայաստան:
«Իմ այսօրվա այցելությունը վկայում և ապացուցում է այն, որ մեր երկու երկրները ունեն ներուժ ապագա ծրագրերի զարգացման և պաշտպանական համագործակցության բնագավառներում: Մեր երկու երկրները կիսում են միևնույն հետաքրքրությունները տարածաշրջանային հարցերում: Մենք հակված ենք տարածաշրջանային խաղաղության և միջազգային օրենքների պահպանմանը: Սրանք պատմական արժեքներ են, որոնք միշտ ուղեկցվում են մարդկության հետ: Այսօրվա մեր ստորագրած պաշտպանական համագործակցության ծրագիրը մեզ տանում է մեկ քայլ առաջ համագործակցության մակարդակում, ինչպես նաև միտված է զարգացնելու տարածաշրջանային անվտանգության տարբեր հարցերում մեր համագործակցությունը»,- ասաց Անգելդիսը:
