Բրիտանական առաջատար բանկերը ջրհեղեղից տուժածներին հատկացրել են 750 միլիոն ֆունտ սթեռլինգ (1.2 միլիարդ դոլար): Ինչպես հաղորդում է ITAR-TASS-ը, այս մասին հայտարարել է Մեծ Բրիտանիայի վարչապետ Դևիդ Քեմերոնը:
Lloyd’s, Nationwide, Royal Bank of Scotland, Santander, HSBC բրիտանական բանկային խմբերի ներկայացուցիչները հաստատել են օգնության հիմնադրամի ստեղծման մասին տեղեկատվությունը: Այդ միջոցները կհատկացվեն տուժած ընտանիքներին և ձեռնարկություններին վարկավորելու համար: Ֆինանսական ինստիտուտները հայտարարել են, որ ջրհեղեղից տուժած շրջանների բնակիչներին երեք ամիս հավելյալ ժամկետ կտրամադրեն պարտքերի վճարման համար, կմեծացվի նաև վարկային քարտերի սահմանը:
Քեմերոնը հայտարարել է, որ բրիտանական կառավարությոնը 5000 ֆունտ սթեռլինգի չափով սուբսիդիաներ կտրամադրի ընտանիքներին և փոքր բիզնեսի ձեռնարկատերերին: Կառավարությունը կստեղծի 10 միլիոն ֆունտի չափով հիմնադրամ ագարակատերերին օգնելու համար: Տուժածներին խոստացել են հատկացնել նաև հարկային արտոնություններ:
Հիշեցնենք, որ տարեսկզբից Մեծ Բրիտանիայում տեղացել է վերջին 248 տարիների տեղումների ամենամեծ քանակը, ինչը դարձել է ջրհեղեղի պատճառ Հարավային Անգլիայում և Ուելսում: Արդյունքում ամբողջ երկրով մեկ հեղեղվել է ավելի քան 8000 տուն:
