«Առաջին լրատվական»-ի զրուցակիցն է ԱԺ անկախ պատգամավոր Էդմոն Մարուքյանը:
– Պարոն Մարուքյան, ասուլիսում ներկայացրեցիք Ձեր տեսակետը` Ստրասբուրգում տեղի ունեցածի կապակցությամբ, այդուհանդերձ հետաքրքիր է իմանալ՝ իսկապե՞ս կարծում եք այդքան ադրբեջանամետ մոտեցում է ԵԱՀԿ Մինսկի շրջանակներում Ֆրանսիայի համանախագահությունը Եվրամիությունով փոխարինելը:
– Եվրամիությունը 28 անդամ երկրներից բաղկացած կառույց է, և պատկերացրեք որոշումների կայացման գործընթացը ինչքան կարող է բարդանալ, եթե Ֆրանսիան փոխարինվի Եվրամիությունով: Սա ուղղակի ամենատարրական փաստարկն է, բազմաթիվ այլ փաստարկներ կան: Միայն այս փաստարկը, սակայն, բավական է, որ հայկական կողմը չհամաձայնի սրան:
– Հստակ է, որ եվրոպացի պատգամավորների այսպիսի կոշտ վերաբերմունքը Հայաստանի՝ Մաքսային միությանն անդամագրվելու հետ է կապված: Սա կարծես առաջին քայլն է, ըստ Ձեզ՝ ուրիշ ի՞նչ կարելի է սպասել, հնարավո՞ր է Հայաստանի դեմ ավելի կտրուկ բանաձևեր ընդունվեն:
– Հետևանքներ արդեն ունեցել է, հոկտեմբեր ամսին եվրոպական խորհրդարանն արդեն ընդունել է այնպիսի բանաձև, որ այդ խորհրդարանի մակարդակում երբևէ նման ձևակերպումներ չի ունեցել՝ խոսքը կոնկրետ ոչ հայանպաստ բանաձևի մասին է՝ Ղարաբաղի հարցով:
Այս առումով կարելի է սպասել այլ նմանատիպ, ոչ հայանպաստ դիրքորոշումների կամ բանաձևերի: Այստեղ բնական է, որ թե՛ Արտաքին գործերի նախարարությունը, թե՛ խորհրդարանական դիվանագիտությունը մեծ անելիքներ ունեն, որ հետագա նմանատիպ բանաձևերը մենք կարողանանք կանխել:
Միանշանակ է, որ կա հիասթափություն և ակնհայտ է, թե ինչն է դրա պատճատը՝ Մաքսային միությանը Հայաստանի անդամակցության վերաբերյալ հայտարարությունը և Ասոցացման համաձայնագրի չստորագրումը, ըստ էության՝ նաև վերջին չորս-հինգ տարիների քաղաքական կուրսի կտրուկ փոփոխությունը: Եվ բնական է, որ եվրոպացի գործընկերները, որոնք այդ տարիների ընթացքում ջանքեր են գործադրել հայկական դիրքերը Եվրամիությունում ամրապնդելու համար, հայկական շահերից բխող բանաձևեր ընդունելու և բանակցություններ վարելու առումով հիասթափված են, շոկի մեջ են, և այդ բանաձևերն ընդունվում են նրանց լուռ կամ ակտիվ աջակցությամբ:
– Պարոն Մարուքյան, Հայաստանը չնախաստորագրեց Ասոցացման համաձայնագիրը և ըստ էության խոշոր ընդվզում չեղավ այդ որոշման դեմ, իսկ Ուկրաինայի Մայդանում մեծ բազմություն է այսօր հավաքված՝ այդ համաձայնագիրը ստորագրելու պահանջով: Բավարա՞ր եք գնահատում եվրոպացիների աջակցությունը նրանց:
– Ես չգիտեմ, թե եվրոպացիներն ինչով են աջակցում Մայդանում կանգնած ժողովրդին, ուկրաինական ժողովրդին: Կարծում եմ, որ Եվրոպական միությունը ավելի ակտիվ նախաձեռնողի դերում պետք է լինի՝ ԱՊՀ տարածքում իր քաղաքականությունը վարելու առումով: Այն փափուկ մոտեցումները, որ կան, դրանք ըստ էության, այսօր արդեն արդիական չեն և չեն գործում: