Եմենի փոխնախագահ Աբդ Ալ-Ռաբու Մանսուր Հադին, որը հայտարարել էր, որ Եմենի նախագահի առողջական վիճակը կատարված մահափորձից հետո շարունակում է ծանր մնալ, և անհայտ է նրա վերադառնալու ժամկետը, նաև ասել է, որ երկիրը կանգնած է լրջագույն խնդիրների առջև: Այս մասին հաղորդում է CNN-ը:
Նա հայտարարել է, որ երկրի իշխանությունները կորցրել են վերահսկողությունը միանգամից 5 շրջանների նկատմամբ, սակայն չի մանրամասնել, թե որ շրջանների վերաբերյալ է խոսքը և ում վերահսկողության տակ են դրանք: Միաժամանակ Աբդ Ալ-Ռաբու Մանսուր Հադին հիշատակել է, որ Եմենի զինված ուժերը բախման մեջ են «Ալ-Քաիդայի» գրոհայինների հետ, որոնք նպաստում են երկրի անկայունությանը:
Տեղեկացնենք, որ «Ալ-Քաիդան», ըստ փորձագետների, ամուր դիրքեր ունի հենց Եմենում, և այստեղից են կազմակերպվում տարածաշրջանում իրականացվող բազմաթիվ ահաբեկչական գործողություններ: Եմենի 25%-ի նկատմամբ վերահսկողության կորուստը կարող է կողմնակի ապացույց լինել, որ «Ալ-Քաիդան» փորձում է քաոսային իրավիճակ ստեղծել արաբական այս երկրում:
