CNN Türk-ի փոխանցմամբ՝ 6-րդ անգամ Ստամբուլի 2-րդ անչափահասների ծանր հանցագործությունների դատարանում հայտնված Ստամբուլի հայկական «Ակօս» թերթի նախկին խմբագրապետ Հրանտ Դինքին սպանած Օգյուն Սամասթը խոսել է իր մեղավորության մասնաբաժնի մասին.
«Ես ինձ վրա եմ ընդունում մեղքի միայն 21 տոկոսը, մնացած 79 տոկոսը բաժին է ընկնում այլ մարդկանց խղճին»։
Հիշեցնենք, որ 2007 թվականի հունվարի 19-ին Ստամբուլի Շիշլի թաղամասում ազգայնական Օգյուն Սամասթը, որը կրում էր սպիտակ գլխարկ, հրազենային 3 կրակոց էր արձակել Դինքի գլխին և բացականչել՝ գյավուր (անհավատ), ինչը հիմք տվեց ենթադրելու, որ սպանությունն իրականացվել է ազգային հողի վրա: Մարդասպանին պետք է հիշեցնել, որ Ղուրանի համաձայն՝ այն ժողովուրդը, որն ունի Սուրբ գիրք, չի կարող կոչվել գյավուր:
Երեկ նշվում էր, որ թուրքական դատարանը կարող է կայացնել Սամասթի դատավճիռը, սակայն դատական նիստը հետաձգվել է։ Սամասթը մեղադրվում է «միտումնավոր կերպով մարդ սպանելու» (ՔՕ 82/1 հոդված) և «ապօրինի զենք կրելու» (թիվ 6136 օրենք) մեջ, ինչի համար նրան սպառնում է 18.8-26 տարվա ազատազրկում։
Ի դեպ, ապրիլի սկզբին էլ Սամասթն իր 5 էջանոց մեղադրականում նշել էր. «Ես ընդհանրապես պատմություն «չգիտեի», չգիտեի, թե «Ակօս»-ն ինչ է, Հրանտ Դինքն ով է, հայերն ովքեր են: Ես միջնակարգ դպրոցն ավարտած մի երիտասարդ էի: Ես «մեղավոր» չեմ, մեղավորը Դինքին ազգի դավաճան հռչակած հրապարակումներն են: Մի՞թե ես եմ Դինքին, Փամուքին պետական դավաճան ճանաչող հաղորդումների ու հոդվածների հեղինակը»:
Իսկ մայիսի վերջին կայացած դատալսման ժամանակ Սամասթը մեղադրել էր թուրքական լրատվամիջոցներին և մասնավորապես Hürriyet և Vatan թերթերին. «Հիմնական մեղավորներն այդ թերթերի ղեկավարներն են, որոնք իրենց թերթերում շարունակ հրապարակում են հայերին առնչվող «հայրենքի դավաճան», «անամոթ հայեր» և նմանատիպ այլ խորագրերով նյութեր։ Ո՞ւր են նրանք, ինչո՞ւ դատարանի առջև չեն կանգնում, ինչո՞ւ են այդպիսի նյութեր տպագրել, ումի°ց են այդպիսի հրահանգ ստացել»։
