Երեկ Եմeնի փոխնախագահ Աբդ Ալ-Ռաբու Մանսուր Հադին, որը գործող նախագահ Ալի Աբդալլահ Սալեհի վրա կատարված ահաբեկչությունից հետո ստանձնել է երկրի ժամանակավոր ղեկավարումը, CNN-ին տված հարցազրույցում հաստատել է, որ Սալեհն ահաբեկչության ժամանակ լրջագույն վնասվածքներ է ստացել:
Նրա խոսքերով՝ Սալեհի վնասվածքներն այնքան լուրջ են, որ ինքը նույնիսկ չի էլ պատկերացնում, թե երբ նա կարող է տուն վերադառնալ Սաուդյան Արաբիայից, ուր տեղափոխվել է բուժում ստանալու: Նա պատմել է, որ տեսել է 68-ամյա նախագահին պայթյունից հետո։ Վերջինս դեմքի, ձեռքերի, մարմնի վերին մասին լրջագույն այրվածքներ էր ստացել: Բացի այդ՝ կրծքի շրջանում մնացել է փայտի մի կտոր:
Նա հավելել է, որ բուժումը կարող է ամիսներ տևել։ «Ես գաղափար չունեմ, թե նա երբ կվերադառնա»,- ասել է Հադին: Հիշեցնենք, որ հունիսի 3-ին Եմենի նախագահական նստավայրում պայթյուն է տեղի ունեցել, որի հետևանքով վիրավորվել էր երկրի գրեթե ողջ բարձրագույն ղեկավարությունը: Մի քանի օր առաջ էլ սաուդյան աղբյուրները հայտնեցին, որ Սալեհն այլևս երբեք չի վերադառնա Եմեն:
