«Առաջին լրատվական»-ի զրուցակիցն է Արցախի նախկին արտգործնախարար Արման Մելիքյանը:
–Ադրբեջանի նախագահ Իլհամ Ալիևը հայտարարել է, որ Ղարաբաղյան հակամարտության կարգավորման շուրջ բանակցությունները պետք է շարունակվեն միայն Բաքվի ու Երևանի միջև, ըստ էության, նորից մերժելով Ստեփանակերտի վերադարձը բանակցությունների սեղանին։Արդյոք հայկական կողմը պետք է պնդի իր դիրքորոշումը և առանց Լեռնային Ղարաբաղի բանակցությունները չշարունակի։
– Պաշտոնական Երևանն արդեն ասել է, որ բանակցային գործընթացն արդյունավետ կլինի միայն այն դեպքում, եթե դրան լիիրավ կերպով մասնակցեն նաև Արցախի բանակցողները և սա արդեն իսկ հայտարարված քաղաքական դիրքորոշում է, որին անհրաժեշտ է հետամուտ լինել: Որևէ մեկի համար անակնկալ չի կարող լինել այն, որ Իլհամ Ալիևը դեմ է պաշտոնական Երևանի կողմից առաջարկվող ձևաչափին, առավել ևս, եթե հիշենք նաև, թե Բաքուն որքան ջանք ու դրամ է ծախսել իր համար հստակ առավելություններ պարունակող բանակցային ներկայիս իրավիճակը ձևավորելու և Արցախը, որպես ինքնուրույն բանակցող կողմ, գործընթացից դուրս մղելու համար: Վարչապետ Փաշինյանը ժամանակին ասել է, որ իրավասու չէ բանակցությունների ընթացքում ներկայացնելու նաև Արցախը: Հետևաբար, հայկական կողմերը պարտավորված են լինելու հակամարտության խաղաղ կարգավորման գործընթացի շրջանակներում ձևավորել այնպիսի նոր քաղաքական ու բանակցային միջավայր, որը ադրբեջանական կողմի դիրքորոշման փոփոխության կհանգեցնի: Դա մասնագիտական լուրջ աշխատանք է պահանջելու մեր գործող իշխանական վերնախավից, բայց լուծելի խնդիր է:
– Սահմանային որոշակի հանդարտ իրավիճակն այս փուլում ինչո՞վ է պայմանավորված, արդյոք դա տևական կլինի։
-Այժմ ադրբեջանական կողմը փորձելու է լուծել Երևան-Բաքու ձևաչափով բանակցությունների շարունակականությունն ապահովելու խնդիրը՝ «տարածքներ՝ ճակատային գծում խաղաղ իրավիճակի պահպանման դիմաց» կարգավորման բանաձևը կյանքի կոչելու նպատակադրմամբ: Այսինքն՝ փորձ է արվելու համոզել ՀՀ նորընտիր իշխանություններին տարածքներ հանձնել, առանց Արցախի կարգավիճակի խնդիրը լուծելու: Հընթացս նաև շանտաժելու են մեր նոր իշխանություններին ասելով, որ եթե այս մոտեցումը մերժվի, ապա շփման գծում հակառակորդը կրկին կակտիվանա ու, առնվազն, դիպուկահարների պատերազմը կվերսկսվի նոր թափով: Շանտաժին տրվել չի կարելի, իսկ դրա փոխարեն հարկավոր է բանակցություններին նոր ընթացք և բովանդակություն հաղորդել:
–Ընտրական փուլի ավարտից և կառավարության վերջնական ձևավորումից հետո արդյոք ՀՀ արդեն ամբողջությամբ լեգիտիմ իշխանությունը քայլեր կձեռնարկի ղարաբաղյան հակամարտության կարգավորման ուղղությամբ։
-Իրականում շատ ավելի կարևոր է, թե Հայաստանի նոր իշխանություններն ինչպես են տեսնում վերջնական կարգավորումը, քան այն՝ թե արդյոք որչափ են լեգիտիմ այսօր: Լեգիտիմությունն անմիջապես կկորցնեն, եթե փորձեն քաղաքացիների կամքին հակառակ տարածքների շուրջ առևտուր սկսել պաշտոնական Բաքվի կողմից առաջարկվող պայմաններով: Մյուս կողմից, անգամ լեգիտիմության սուր դեֆիցիտ ունեցող իշխանությունը իսկույն կստանա մեր համաքաղաքացիների բացարձակ մեծամասնության անվարան աջակցությունը, եթե այս հարցում մեր շահերն իրապես ապահովող տևական խաղաղություն կարողանա հաստատել:
