Լոռու մարզի ընդհանուր իրավասության դատարանում Սուսաննա Գզոգյանի նախագահությամբ ավարտվել է Գայանե Ա.-ի գործի դատական քննությունը:
52-ամյա Գայանե Ա.-ին մեղադրանք էր առաջադրվել ՀՀ քրեական օրենսգրքի 262 հոդվածի 1-ին մասով այն բանի համար, որ նա, 2017 թվականի մայիսից աշխատելով Վանաձորի Բաթումի փողոցում գործող շոգեբաղնիքում՝ որպես սպասարկող-մենեջեր, 2017 թվականի աշնանից մինչև 2018 թվականի հունվարի 4-ն ընկած ժամանակահատվածում հիշյալ հաստատությունը պարբերաբար օգտագործել ու տրամադրել է պոռնկությամբ զբաղվող անձանց: Ըստ մեղադրանքի՝ Գայանե Ա.-ն շոգեբաղնիքի հաճախորդ տղամարդկանց խնդրանքով նրանց համար հրավիրել է մարմնավաճառ Սուսան Մ.-ին: Վերջինս շոգեբաղնիքում գումարի դիմաց սեռական հարաբերություններ է ունեցել տղամարդկանց հետ:
Մենեջեր Գայանե Ա.-ն, ըստ մեղադրանքի, յուրաքանչյուր անգամ, բացի շոգեբաղնիքի վարձավճարից՝ որպես գույքային օգուտ՝ հաճախորդների կողմից հավելյալ ստացել է 1000-2000 դրամ՝ մարմնավաճառուհուն հրավիրելու և շոգեբաղնիքում սեռական հարաբերություն ունենալու հնարավորություն ընձեռելու համար:
Հերթական դատական նիստին ամբաստանյալ Գայանե Ա.-ն խնդրել է իր նկատմամբ կիրառել Համաներման ակտի համապատասխան դրույթը, կարճել քրեական գործի վարույթը, դադարեցնել իր նկատմամբ քրեական հետապնդումը:
Դատարանը Համաներման ակտի կիրառման համար խոչընդոտներ չի արձանագրել:
Համաներման ակտի համապատասխան դրույթի կիրառմամբ Գայանե Ա.-ի քրեական հետապնդումը դադարեցվել է, քրեական գործի վարույթը՝ կարճվել: