ՀՀ գյուղատնտեսության նախարար Սերգո Կարապետյանը երեկ ընդունել է ՀՀ-ում Իսրայելի պետության արտակարգ և լիազոր դեսպան Շմուել Մեիրոմին: Այս մասին ասվում է ՀՀ գյուղատնտեսության նախարարության այսօր տարածած հաղորդագրությունում։
Հանդիպման ընթացքում քննարկվել են գյուղատնտեսության բնագավառում հայ -իսրայելական համագործակցության հեռանկարները: Սերգո Կարապետյանն ու Շմուել Մեիրոմին ընդգծել են այն ընդհանրությունները, որոնք առկա են Հայաստանի և Իսրայելի միջև։ «Փոքր տարածքում ու սահմանափակ հողային ռեսուրսներով, գիտական ռեսուրսների հաշվին կարողանում ենք ապահովել բարձր արտադրողականություն»,- նշել է ՀՀ գյուղատնտեսության նախարարն ու հատկապես կարևորել Իսրայելի գիտական ձեռքբերումները գյուղատնտեսության բնագավառում:
Որպես համագործակցության ճյուղեր՝ մատնանշվել են ոռոգման ժամանակակից տեխնոլոգիաների ներդրման բնագավառում փորձի փոխանակումը, անասնապահության, ջերմոցային տնտեսությունների ստեղծման գործում համագործակցությունը:
«Մենք պատրաստ ենք «ՄԱՇԱՎ» ծրագրի շրջանակներում համագործակցել Հայաստանի հետ, որը կարող է ներառել բազմաթիվ ոլորտներ: Պարենի համաշխարհային կազմակերպության կողմից Հայաստանում իրականացվող «Կայուն դպրոցական սնունդ» ծրագրի շրջանակում իսրայելական կողմը պատրաստ է տրամադրել մասնագիտական խորհրդատվություն։ Այս հարցում առավել ուշադրություն է հարկավոր, քանի որ խոսքը վերաբերում է երեխաներին»,- նշել է դեսպանը:
