ԵԽԽՎ-ում ՀՀ ԱԺ պատվիրակության անդամ, ՙԺառանգություն՚ խմբակցության ներկայացուցիչ Զարուհի Փոստանջյանը լրագրողների հետ հանդիպման ժամանակ ամփոփեց ԵԽԽՎ ամառային նստաշրջանը:
Նա նշեց, որ Հայաստանի համար այս նստաշրջանում ամենահետաքրքրիր և կարևոր հարցերն էին մոնիտորինգի հանձնաժողովի կողմից կազմված զեկույցի բանաձևի և հանձնարարականի քննարկումը, նաև մարդու իրավունքների պաշտպանության հարցում ազգային խորհրդարանների դերի վերաբերյալ բանաձևի քննարկումը: Վերջին բանաձևը իրենից ենթադրում է, որ ԵԽԽՎ անդամ պետությունների խորհրդարանները պետք է լինեն մարդու իրավունքների երաշխավորը երկրում, պետք է հետևեն, թե ինչպես են իրականացվում մարդու իրավունքների եվրոպական դատարանի որոշումները:
Փոստանջյանը տեղեկացրեց, որ այս բանաձևի քննարկման ժամանակ ինքը հայտարարությամբ է հանդես եկել՝ նշելով, որ Հայաստանի խորհրդարանը այդ տարիների ընթացքում եղել է ոչ թե մարդու իրավունքների պաշտպանության երաշխավորը, այլ իր իսկ որոշումներով ստանձնել է մարդու իրավունքները խախտողների նոտարի դերը: Փոստանջյանը հիշեցրեց, թե ինչպես 2008 թվականի մարտի 1-ի իրադարձություններից հետո իրենց գործընկերները զրկվեցին անձեռնմխելիությունից, մանդատից և ազատազրկվեցին. «Նույն այդ ԱԺ-ի հրամանագրով ՀՀ զինված ուժերը ապօրինի օգտագործվեցին ժողովրդի դեմ՝ դրանով խախտելով մարդկանց տեղաշարժի և այլ հիմնարար իրավունքները»:
Զարուհի Փոստանջյանը նաև կարևորեց ԵԽԽՎ-ում Սերժ Սարգսյանի ելույթը և հարց ու պատասխանը՝ ասելով, որ, ի տարբերություն մեր խորհրդարանի, ԵԽԽՎ-ում հնչում է հարցը և պատասխանը, և հարց տվողը արձագանքելու իրավունք չունի: