Ալեքսանդր Սպենդիարյանի անվան օպերայի և բալետի ազգային ակադեմիական թատրոնում այս տարի ներկայացման պրեմիերաների թիվը մի քանի անգամ ավելացել է՝ համեմատած նախորդ տարիների հետ, ավելացել է նաև հրավիրված արտիստների՝ աշխարհահռչակ արվեստագետների թիվը:
Թատրոնի տնօրեն և գեղարվեստական ղեկավար Կոնստանտին Օրբելյանն «Առաջին լրատվական»- ի հետ զրույցում անդրադառնալով հարցին, թե արդյո՞ք այս տարի մշակույթի նախարարության կողմից ավելի մեծ ծավալի պետական հովանավորություն է հատկացվել, նշեց. «Ես այնպիսի մարդկանցից չեմ, ով սպասում է պետական ֆինանսավորումների, սովորաբար նախարարությունը ոչ մեծ գումարներ է հատկացնում տարեկան մեկ ներկայացման համար:
Անցած տարի մենք կարողացանք նորոգման աշխատանքներ իրականացնել, կարգի բերել ճեմասրահը և մի քանի ներկայացում բեմադրել: Ունենք հովանավորներ, այդ թվում նաև «Արդշինբանկը», նաև ուղղակի բարի մարդիկ կան, որոնց շնորհիվ մենք այս տարի ավելին կարողացանք անել:
Հիմնականում ես հույսս դնում եմ ինձ վրա, իմ ընկերների և գործընկերների վրա»:
Անդրադառնալով Օպերայի և բալետի թատրոնի գործունեության վերաբերյալ վերջին շրջանում հնչող քննադատություններին ու բացասական գնահատականներին՝ մաեստրոն նախ նշեց, որ հիացած է մեր արտիստների՝ աստղերի կարողություններով, այնուհետև ընդգծեց, որ եթե ոչ ոք ոչինչ չի անում, նաև քննադատելու բան չի լինում, իսկ եթե որևէ մեկն ինչ-որ բան է անում, կարելի է և քննադատել. «Այնպես որ ես պատրաստ եմ ընդունել քննադատություն. ես միշտ արել եմ այն, ինչ ուզել եմ անել և հաջողություններ եմ ունեցել»:
Մանրամասն՝ տեսանյութում:
