Անգլիայի Պրեմիեր լիգայի 17-րդ տուրում Լոնդոնի «Արսենալը» անսպասելի պարտություն կրեց հյուրընկալվելիս՝ 2:3 հաշվով զիջելով մրցաշարային աղյուսակի վերջնամասում գտնվող «Սաութհեմփթոնին»:
Մինչ այս «Արսենալը» չէր պարտվել 22 հանդիպումներում, ինչը բավական բարձր ցուցանիշ է: Մրցակցի հարկի տակ «Արսենալը» խաղաց առաջին համարով, սակայն պարտվեց առաջին հերթին գլխավոր մարզիչ Էմերիի թույլ տված տակտիկական վրիպումների հետևանքով: Մասնավորապես, լոնդոնյան ակումբը խաղը սկսեց 3-4-3 հարձակողական մարտավարությամբ: Ու թեև «Սաութհեմփթոնը» առաջինը հաջողության հասավ, այնուամենայնիվ «Արսենալի» եզրերը, կարելի է ասել, ակտիվ էին, և հենց ձախ եզրով ձեռնարկված գրոհից հետո Մխիթարյանը հավասարեցրեց հաշիվը:
Վերջին հանդիպումներում Էմերիի փոփոխությունները բավական դիպուկ էին, որոնք էապես նպաստել էին դրական արդյունքներին: Այս անգամ, սակայն, Էմերիի փոփոխությունները ոչ միայն անտրամաբանական էին, այլև ավերիչ «Արսենալի» խաղային մոդելի համար: Մասնավորապես, Էմերին աջ եզրային Վիգներ Բելերինի փոխարեն խաղադաշտ դուրս բերեց կենտրոնական հարձակվող Լակազետին: Դրան հաջորդեց աջ կիսապաշտպան Իվոբիի փոխարեն Օզիլին ասպարեզ դուրս բերելը: «Արսենալի» խաղային առանցքը վերջնականապես փլուզվեց, երբ Էմերին պաշտպանության աջ գոտում խաղացող Լիխշտայների փոխարեն դաշտ մտցրեց Մայթլենդ-Նայլսին: Անհասկանալի էր նաև հենակետային կիսապաշտպան Ջակային պաշտպանությունում օգտագործելը:
Հասկանալի է, որ Էմերին երկրորդ կեսի միջնամասում ռիսկի դիմելով փորձում էր հաղթանակի հասնել: Բայցևայնպես ռիսկի գնալու հետ մեկտեղ չէր կարելի պաշտպանական օղակն ըստ էության զրոյացնել: Դաշտի տերերը առանց դժվարության օգտագործեցին «Արսենալի» պաշտպանությունում առաջացած ահռելի բաց տարածությունները: Ինչ խոսք, բաց թողնված երրորդ գոլում կարելի է մեղադրել դարպասապահ Լենոյին, բայց ընդունենք, որ «Սաութհեմփթոնի» հաղթանակը տրամաբանական էր և օրինաչափ:
Չնայած պարտությանը՝ «Արսենալի» կիսապաշտպան Հենրիխ Մխիթարյանը ճանաչվել է հանդիպման լավագույն ֆուտբոլիստ՝ արժանանալով ամենաբարձր՝ 8.4 գնահատականի: Մեր ֆուտբոլիստն առաջին անգամ դուբլ ձևակերպեց Պրեմիեր լիգայում: Վերջին անգամ ակումբային մակարդակում Մխիթարյանը դուբլի հեղինակ էր դարձել 2015 թվականին, երբ ելույթ էր ունենում Դորտմունդի «Բորուսիայում»: Իր վրա վերցնելով խաղը «Արսենալի» համար ծանր իրավիճակում՝ Մխիթարյանը երկու անգամ շտկեց իրավիճակը, բայց…
Մխիթարյանը փորձում էր պահպանել «Արսենալի» խաղային տեմպը՝ կատարելով մեծ ծավալի աշխատանք: Փոխարինման դուրս եկած ֆուտբոլիստները, չկարողանալով գտնել իրենց դիրքը խաղադաշտում, նպաստեցին, որ «Արսենալի» գրոհները հախուռն բնույթ կրեին: Այս իրավիճակում Մխիթարյանի համար դժվար էր եղանակ ստեղծել, քանզի «Սաութհեմփթոնի» կիսադաշտում առաջացել էր կուտակում:
Մխիթարյանի աշխատանքը, կարծում ենք, կտար իր արդյունքը, եթե 3-4-3 սխեման պահպանվեր, և շեշտը դրվեր գրոհները եզրերով զարգացնելու վրա: Նախորդ հանդիպումներում «Արսենալի» դրական արդյունքները կարելի է կապել ուժեղ հարձակողական եզրերի հետ:
«Պարտությունից ոչ ոք ապահովագրված չէ: Մենք կարող էինք ձախողվել ցանկացած մրցավեճում, և դա տեղի ունեցավ այսօր: Շնորհավորում եմ մրցակցին: «Սաութհեմփթոնն» արժանի էր այս հաղթանակին, քանզի գործում էր գերմոտիվացված, շարունակ գրոհում էր՝ ստիպելով մեր ֆուտբոլիստներին սխալներ թույլ տալ: Սա ֆուտբոլ է, և նման հանդիպումներում միշտ չէ, որ հաջողության ենք հասնում: Պետք է խոստովանեմ, որ նման պարտությունները կարող են դուրս մղել լավագույն քառյակի համար պայքարից: Պետք է վերլուծենք և փորձենք շտկել սխալները: Պետք է աշխատենք ավելի լավը և զորեղ դառնալու համար: Մենք բազմաթիվ գոլային հնարավորությունները չօգտագործեցինք, իսկ մրցակիցը 3 անգամ գրավեց մեր դարպասը: Նման խաղում 3 գնդակ ընդունելն իսկապես մտահոգիչ է, և հենց այս ուղղությամբ պետք է լրջորեն աշխատենք: Պետք է շարունակենք մեր ճանապարհը և կատարենք մեր պարտականությունները 90 րոպե»,- խաղից հետո ասել է Էմերին:
Այս պարտության պատճառով «Արսենալը» նահանջել է 5-րդ հորիզոնական և երեք միավորով զիջում է 4-րդ տեղում գտնվող «Չելսիին»: Մրցաշարային աղյուսակը շարունակում է գլխավորել «Լիվերպուլը», որը երեկ սկզբունքային մրցավեճում 3:1 հաշվով առավելության հասավ «Մանչեսթեր Յունայթեդի» նկատմամբ: Յուրգեն Կլոպի թիմն ունի 45 միավոր և մեկ միավորով գերազանցում է երկրորդ հորիզոնականում գտնվող «Մանչեսթեր Սիթիին»: Լավագույն եռյակը եզրափակող «Տոտենհեմն» ունի 39 միավոր:
Երկու օր անց «Արսենալը» Անգլիայի լիգայի գավաթի շրջանակներում «Էմիրեյթս» մարզադաշտում մրցելու է հենց «Տոտենհեմի» հետ: Հիշեցնենք, որ Անգլիայի Պրեմիեր լիգայի 14-րդ տուրում «Արսենալը» դրամատիկ խաղում 4:2 հաշվով առավելության էր հասել «Տոտենհեմի» նկատմամբ, և շատերն այս մրցավեճը որակում են ռևանշի խաղ: Դեկտեմբերի 22-ին էլ Պրեմիեր լիգայի 18-րդ տուրի շրջանակներում «Արսենալը» սեփական հարկի տակ կմրցի «Բարնլիի» հետ:
