Ցեղասպանության ժխտումը քրեականացնելու մասին Ֆրանսիայի նախագահ Ֆրանսուա Օլանդին Անկարայում ուղղված հարցը խիստ հստակ էր, մինչդեռ նրա պատասխանը՝ խիստ անորոշ: Միաժամանակ, քիչ հավանական է, որ նա նման նախաձեռնություն սկսի՝ նկատի ունենալով հարցի վտանգավոր լինելը: «Առաջին լրատվական»-ի հետ զրույցում նման տեսակետ հայտնեց Ֆրանսիայի Ռոլ-Ալպի շրջանային խորհրդի անդամ Հիլդա Չոբոյանը՝ պատասխանելով այն հարցին, թե հնարավո՞ր է վերջինիս ցածր վարկանիշը բացասաբար ազդի Ցեղասպանության ժխտումը քրեականացնող օրենքի ընդունման վրա:
«Այն, որ Ֆրանսիայում Օլանդը ամենացածր վարկանիշ ունեցող քաղաքական գործիչն է, միանշանակ պնդել չի կարելի: Յուրաքանչյուր նախագահի ղեկավարման ընթացքում կարող են լինել վայրիվերումներ: Ֆրանսուա Օլանդը մեծ դժվարություններ ունի ներքին քաղաքականության մեջ, մասնավորապես՝ տնտեսական իրավիճակի պատճառով: Միաժամանակ, ճիշտ է, որ տկար քաղաքական դեմքը հանրությանը չպետք է նման կարևորագույն հարց բարձրացնի:
Ցեղասպանության քրեականացումը ժխտելու մասին հարցը ոչ վաղ անցյալում բուռն քննարկումների նյութ դարձավ, և եթե դրան առանց նախապատրաստական աշխատանքների ևս մեկ անգամ անդրադարձ կատարվի, անկասկած՝ բավական մեծ դժվարությունների կհանդիպեն թե Օլանդը և թե նախաձեռնությունն ինքնին»,- ասաց Հիլդա Չոբոյանը:
Ռոլ-Ալպի շրջանային խորհրդի անդամի խոսքով՝ Ֆրանսիայի նախագահն իրականում այնքան էլ վճռական չի արտահայտվել հայտնի օրինագծի վերաբերյալ:
«Ֆրանսուա Օլանդի խոսքը շատ երկդիմի էր, անորոշ և ընդհանրական: Այն կարելի է մեկնաբանել երկու-երեք տարբերակներով: Եվ ամենակարևորը՝ նա չարտասանեց «ցեղասպանություն» բառը»,- ասաց Հիլդա Չոբոյանը:
Հիշեցնենք, որ Թուրքիա կատարած պետական այցի շրջանակներում Ֆրանսուա Օլանդը, պատասխանելով Ցեղասպանության ժխտումը քրեականացնելու մասին հարցին, նշել էր. «Պատմական դեպքերի ցավերը համատեղ ցավեր են: Պատմության վերաբերյալ նյութերը կարող են ցավոտ լինել, բայց, համենայնդեպս, պետք է իրականացվեն»:
