RT հեռուստաալիքին տված հարցազրույցում Բոլիվիայի նախագահ Էվո Մորալեսը իր վերաբերմունքն է արտահայտել ԱՄՆ զանգվածային լրտեսության վերաբերյալ: Էվո Մորալեսի կարծիքով՝ Վաշինգտոնի այդ գործողությունները հազիվ թե նպաստեն միջազգային անվտանգության ամրապնդմանը: Նա նաև հավելել է, որ համընդհանուր բարօրության համար ճիշտ կլիներ լրտեսել հենց Բարաք Օբամային:
«Ես չեմ հասկանում՝ ինչի համար է նրանց պետք հրապարակավ հայտարարել, որ իրենք պատրաստվում են որևէ մեկին լրտեսել: Տրամաբանական չէ, որ ամերիկացիները մեզ արդեն նախազգուշացնում են այդ մասին: Նրանք դա բացատրում են նրանով, որ լրտեսությունն իրենց թույլ է տալիս աշխարհում անվտանգություն ապահովել»,- ասել է Մորալեսը՝ մեկնաբանելով Օբամայի այն հայտարարությունը, թե ԱՄՆ-ը այլևս չի լրտեսի այլ երկրների նախագահներին, եթե իրական սպառնալիք չլինի:
Մորալեսի խոսքերով՝ աշխարհում անվտանգություն ապահովելու համար նախևառաջ անհրաժեշտ է գաղտնալսել հենց Բարաք Օբամայի հեռախոսազրույցները: «Դա էլ կապահովի ամբողջ աշխարհի անվտանգությունը: Ի՞նչ անվտանգություն կարող է մեզ երաշխավորել ԱՄՆ-ը, երբ ՆԱՏՕ-ն և «կապույտ սաղավարտավորները» իրենց զորքերը այդքան երկրներ են մտցրել և այդքան մեծ քանակությամբ ռազմական բազաներ տեղադրել: Այդ պատճառով էլ ես ասում եմ, որ ամբողջ աշխարհում անվտանգության կարելի է հասնել, եթե լրտեսվի հենց Բարաք Օբաման»,- ընդգծել է Բոլիվիայի նախագահը:
Բացի այդ, Մորալեսը նշել է, որ ՄԱԿ-ի անդամ երկրների մոտ 99 տոկոսը աջակցում է Կուբային և մերժում այդ երկրի տնտեսական արգելափակումը:
