Ատոմային էներգիայի միջազգային գործակալության փորձագետներն այսօր ժամանել են Իրան՝ երկրի հարավում գտնվող Գաչինի ուրանի հանքավայր այցելելու համար: Այս մասին հայտնում է IRNA գործակալությունը:
Ինչպես հայտարարել է Իրանի ատոմային էներգիայի կազմակերպության ներկայացուցիչ Բեհրուզ Կամավալդին, ԱԷՄԳ-ի երեք ներկայացուցիչները երեքշաբթի առավոտյան ժամանել են Թեհրանի օդանավակայան:
Նրա խոսքով՝ չորեքշաբթի փորձագետները կլքեն Իրանի մայրաքաղաքը և կուղևորվեն Հորմուզգան նահանգ, որտեղ գտնվում է ուրանի հանքավայրը: ԱԷՄԳ-ի փորձագետների այցը կավարտվի չորեքշաբթի երեկոյան: Իրան այցից հետո կազմակերպության ներկայացուցիչները կուղևորվեն Վիեննա, որտեղ էլ գտնվում է գործակալության կենտրոնակայանը:
Գաչինում տեսչական այցը կատարվում է Թեհրանում նոյեմբերի 11-ին ստորագրված Իրանի և ԱԷՄԳ-ի միջև համագործակցության մասին շրջանակային համաձայնագրի շրջանակում:
