Երեկ ցուցադրվեց ազատամարտիկ, պահեստազորի գնդապետ Վոլոդյա Ավետիսյանի մասին պատմող «Անազատամարտիկը» ֆիլմը: Ֆիլմի ավարտին «Առաջին լրատվական»-ի հետ զրույցում «Նախախորհրդարանի» անդամ Վարդան Հակոբյանն ասաց, որ ինքն ունի միաժամանակ ամոթի և հպարտության զգացում: «Ֆիլմը մեր բարոյահոգեբանական վիճակի մասին է, որը շատ աղետալի է մեզ համար: Մենք էկրանին տեսանք՝ այն մարդիկ, որոնք 20 տարի առաջ պատրաստ էին մեռնելու իրենց հայրենիքի համար, այսօր մեռնում են իրենց հայրենիքի անտարբերությունից: Հալածանքներ են նրանց հանդեպ, որքեր փորձում են իրենց խնդիրները բարձրաձայնել»,- ասաց նա:
Վ.Հակոբյանը նշեց, որ ամենավատն այն է, որ Վոլոդյա Ավետիսյանի ընկեր-բանակի գնդապետները չգիտեն՝ ինչ է կատարվում իրենց զինակցի հետ, սուտ են խոսում, իսկ նման մարդիկ սպայի ուսադիր կրելու իրավունք չունեն: «Բանակը ժողովրդի բանակն է, փառապանծ ճանապարհ անցած բանակ է: Ես կուզենայի այնպիսի բանակ տեսնել, ուր ամեն ծնող իր երեխային հպարտությամբ կուղարկեր, ոչ թե սպասումներով, թե ինչ կկատարվի նրա հետ»,- իր մաղթանք-մտորումը հայտնեց մեր զրուցակիցը:
Շնորհավորելով զինված ուժերի 22-րդ տարեդարձը՝ նա բոլոր զինվորներին մաղթեց բարի վերադարձ:
Մանրամասները դիտե՛ք տեսանյութում
