ՄԱԿ-ի գլխավոր քարտուղար Պան Գի Մունը, ով Կուբա է այցելել որպես հյուր այսօր բացվող Լատինաամերիկյան և կարիբյան պետությունների համագործակցության (CELAC) գագաթնաժողովին, հանդիպել է Կուբայի առաջնորդ Ռաուլ Կաստրոյի հետ և կտրել մազերը Հավանայի վարսավիրանոցներից մեկում: Այս մասին հայտնում է RIA Novosti-ն՝ հղում անելով լատինաամերիկյան ԶԼՄ-ներին:
Կուբայի առաջնորդի և ՄԱԿ-ի գլխավոր քարտուղարի բանակցություններն անցել են Հեղափոխության պալատում: Հիշեցնենք, որ նախկին քարտուղար Քոֆի Անանը Կուբա էր այցելել 2006 թվականին, երբ Հավանայում անցկացվում էր Չմիավորման շարժման երկրների գագաթնաժողովը:
Կղզի ժամանելով՝ Պան Գի Մունը հայտարարել է, որ շատ հետաքրքրված է Կուբայում տեղի ունեցող փոփոխություններով, և վստահեցրել է, որ ՄԱԿ-ը ձգտում է Կուբայի հետ համատեղ աշխատել: Նա այցելել է նաև Սեռական դաստիարակության ազգային կենտրոն, որի ղեկավարը Ռաուլ Կաստրոյի դուստրն է՝ Մարիելան:
Սպասվում է, որ այսօր բացվելիք գագաթնաժողովի հիմնական թեման կդառնա պայքարն աղքատության ու անհավասարության դեմ, ԱՄՆ-ի ու Կուբայի հարաբերությունները, Ֆոլկլենդյան կղզիների շուրջ իրավիճակը և այլն:
