Կուսակցությունների նախընտրական ծրագրերում ընդհանուր անդրադարձ կա արտաքին քաղաքականությանը, իսկ, օրինակ, հայ- իրանական հարաբերությունները գրեթե անտեսված են այս քարոզարշավի ընթացքում։ Ի՞նչն է խնդիրը «Առաջին լրատվական»-ի հարցին իրանագետ, փորձագետ, «Լուսավոր Հայաստան» կուսակցության կողմից առաջադրված ԱԺ պատգամավորության թեկնածու Արմեն Վարդանյանը պատասխանեց․ «Չգիտեմ՝ ինչն է պատճառը, բայց դրանք Հայաստանի համար շատ կարևոր են՝ Իրանը Հայաստանի համար բացառիկ նշանակություն ունեցող երկիր է՝ մեր հարավային հարևանը և հարավային դարպասը դեպի արտաքին աշխարհ։ Ցավալի է, որ այս երկրի հետ հարաբերություններին շատ քիչ են անդրադառնում։ Պետք է նշել, որ ընդհանրապես ծրագրային դրույթներ այս քարոզարշավի ընթացքում շատ քիչ են նշվում թեկնածուների կողմից։ Հիմնականում, կարծես թե, ընտրապայքարը, քարոզարշավը տարվում է մրցակիցների վրա ցեխ շպրտելու ճանապարհով, և գաղափարական, ծրագրային դրույթներ շատ քիչ են առաջ մղվում թեկնածուների կողմից»։
«Այսօր հայ-իրանական հարաբերությունները քաղաքական մասով ամենաբարձր մակարդակի վրա են գտնվում՝ երկու երկրների միջև քաղաքական տարաձայնություններ չկան, ֆանտաստիկ լավ հարաբերություններ ունեն։ Հայաստանն այն քիչ հարևաններից է, որի հետ Իրանը վերջին 25-30 տարիներին որևէ խնդիր չի ունեցել։ Բայց ցավալիորեն պետք է նշել, որ տնտեսական հարաբերությունները համաչափ չեն քաղաքական հարաբերություններին։ Ունենալով այդպիսի ֆանտաստիկ քաղաքական հարաբերություններ, տնտեսական հարաբերությունները ցածր մակարդակի վրա են գտնվում»,- հավելեց պատգամավորության թեկնածուն։
Ամբողջությամբ՝ տեսանյութում։