Բրյուսելում մեկնարկել են Եվրամիությանն Իսլանդիայի անդամակցության վերաբերյալ բանակցությունները: Ինչպես տեղեկացնում է RIA-Novosti լրատվական գործակալությունը, այս մասին հայտնել է Իսլանդիայի ԱԳ նախարար Օսուր Սկարֆեդինսոնը՝ այս իրադարձությունն անվանելով «պատմական»:
Երկուշաբթի օրը կողմերը սկսել են այսպես կոչված՝ 35 «գլխից» բաղկացած թղթապանակի 4 կետերի քննարկումը: Որպեսզի թեկնածու երկրի հետ պայմանագիր ստորագրվի Եվրոմիություն մտնելու համար, անհրաժեշտ է ավարտել քննարկումները բոլոր «գլուխների» վերաբերյալ, որի ընթացքում համեմատվում են տվյալ երկրի ազգային օրենսդրության և ԵՄ օրենսդրության համապատասխանությունները տարբեր ոլորտներում, ինչպիսիք են՝ տնտեսական և դրամային քաղաքականությունը, արդարադատությունը, հարկային գործունեությունը, էներգետիկան, գյուղատնտեսությունը, ձկնորսությունը և այլն:
Սկարֆեդինսոնի խոսքերով՝ Իսլանդիան արդեն այս տարվա վերջին պլանավորել է ավարտել «գլուխների» կեսի քննարկումները ԵՄ-ի հետ, իսկ մնացածի վերաբերյալ քննարկումները կավարտվեն 2012 թ. առաջին կեսին: Ըստ դիտորդների՝ Իսլանդիայի համար խոչընդոտ է հանդիսանում ձկնորսությունը: Ավելի վաղ Իսլանդիան ԵՄ հետ խնդիր է ունեցել՝ միակողմանի ավելացնելով սկումբրիայի որսի քանակը: Բացի այդ, Իսլանսդիան և ԵՄ-ն հակառակ դիրքորոշում ունեն կետի որսի վերաբերյալ:
Իսլանդիան, որն ունի 320,000 բնակչություն, անցյալ տարվա ամռանը դիմել էր ԵՄ՝ անդամակցելու խնդրանքով, քանի որ երկրի բանկերի մեծ մասը սնանկացել էին, և երկրի տնտեսական վիճակը ծայրահեղ վատ էր: Այսպիսով, տնտեսական ճգնաժամը ստիպեց Ռեյկյավիկին տասը տարի մտորումներից հետո ապաստան փնտրել ԵՄ-ում:
Դիտորդների կարծիքով, ամենայն հավանականությամբ Իսլանդիան ԵՄ-ին կանդամակցի 2013 թ.։