Ադրբեջանական Trend լրատվական գործակալության փոխանցմամբ՝ Վրաստանի փոխարտգործնախարար Նինո Կալանդաձեն ռուսական կողմին հասցեագրած նոտա է հղել Շվեյցարիայի դեսպան Գյունթեր Բեսլերին։
Նոտայում վրացական կողմը պատրաստակամություն է հայտնել բանակցություններ սկսել Ռուսաստանի հետ ՄԱԿ-ի կոնվենցիաների խախտմանն առնչվող վեճերի հարթման շուրջ։
Խոսքը Աբխազիայից և Հարավային Օսիայից վտարված էթնիկ վրացիների՝ իրենց տները վերադառնալու իրավունքի խախտման, մինչև 2008 թվականը Աբխազիայում և Հարավային Օսիայում իրականացված խտրականության (ունեցվածքի միտումնավոր վնասում ու ոչնչացում, կրթական, մշակութային ու լեզվական իրավունքների խախտում, տեղաշարժի սահմանափակում) մասին է։
Բացի այդ, վրացական նոտայում արծարծվում է 2008 թվականի օգոստոսին տեղի ունեցած ռուս-վրացական պատերազմի արդյունքում Հարավային Օսիայից ու հարակից շրջաններից վտարված էթնիկ վրացիների իրավունքների ոտնահարումը։
Հիշեցնենք, որ ապրիլի 1-ին, Հաագայի միջազգային դատարանի որոշմամբ, հաստատվել էր Վրաստանի և Ռուսաստանի միջև վեճի առկայությունը, Ռուսաստանը ճանաչվել էր հակամարտող կողմ։ Միևնույն ժամանակ դատարանը Վրաստանին կոչ էր արել Ռուսաստանի հետ երկխոսություն սկսել վիճելի խնդիրների շուրջ։