Կա՞ արդյոք մեր մոլորակի վրա մի էակ, որն անմահ է: Պարզվում է՝ դա Turritopsis nutricula մեդուզան է: Ծովերի այս խորհրդավոր տիրուհին երբեք իր մահով չի մահանում, այսինքն՝ գործնականում այն անմահ է:
Այս մեդուզան ակտիվորեն ուսումնասիրում են գենետիկները և ծովի կենսաբանության մասնագետները: Նրանք փորձում են հասկանալ, թե ինչպես է հաջողվում այս փոքրիկ էակին հաղթահարել ծերության գործընթացը:
4-5 միլիմետր շառավղով այս մեդուզան մեր մոլորակում միակ արարածն է, որը կարող է ինքնուրույն վերականգնվել և երիտասարդանալ: Այդ փուլը մեդուզան կարող է կրկնել անթիվ անգամներ, և դա նրան անմահացնում է:
Այս ֆենոմենի բացահայտումը պատահաբար է տեղի ունեցել: Իտալացի Ֆերնանդո Բոերոն փորձերի համար իր ակվարիումը լցրել էր մեդուզաների այս տեսակով: Սակայն փորձերը ինչ-ինչ պատճառներով հետաձգվել էին՝ ակվարիումը չորացել էր: Գիտնականին թվացել էր, թե ակվարիումի պարունակությունը մահացել է, սակայն դրանք դեն գցելուց առաջ նա փորձել էր ուսումնասիրել ավելի փոքրացած մեդուզաների գլխիկները: Ի զարմանս նրա՝ պարզվել էր, որ դրանք դեռ կենդանի են, ուղղակի վերածվել են ձվերի: Բոերոն ակվարիումը կրկին լցրել էր ջրով և որոշ ժամանակ անց նկատել, որ ձվերից կրկին մեդուզաներ են աճել:
Հետագա փորձերը ցույց են տվել, որ այս փոքր՝ ոչնչով աչքի չընկնող էակները կարող են ինքնուրույն կառավարել իրենց գեները: Վտանգի դեպքում դրանք ժամանակը «հետ են շարժում», կրկին վերադառնում զարգացման «մանկական» փուլ և կյանքը նորից սկսում:
