Վրաստանում նախօրեին տեղի ունեցած նախագահական ընտրությունների երկրորդ փուլում հաղթել է նախկին արտգործնախարար Սալոմե Զուրաբիշվիլին, որը վայելում է «Վրացական երազանք» իշխող դաշինքի աջակցությունը։ Նա ստացել է ձայների մոտ 60 տոկոսը, իսկ ընդդիմադիր թեկնածու Գրիգոլ Վաշաձեն ստացել է ձայների մոտ 40 տոկոսը։ Ընտրությունների արդյունքներն անակնկալ չէին։
«Եվրոպական Վրաստան» կուսակցության Ջավախքի լիդեր Արսեն Կարապետյանի դիտարկմամբ՝ 10 տոկոս ընտրությունների արդյունքի վրա ազդել են վարչական ռեսուրսի կիրառումը, ընտրակաշառքը։ «Առաջին լրատվական»-ի հետ զրույցում նա նշեց, որ հայերի համակրանքը Վաշաձեի կողմն է, և եթե չլիներ ադմինիստրատիվ ռեսուրսի կիրառում, ռեալ ընտրություն լինելու դեպքում Բիձինա Իվանիշվիլին կպարտվեր:
«Հաշվի առնելով ադմինիստրատիվ ռեսուրսը, ծախսած ռեսուրսը՝ կարող եմ ասել, որ Բիձինա Իվանիշվիլին պարտվել է, քանի որ վարչական ռեսուրսի գերչարաշահում է եղել»,- ասաց Արսեն Կարապետյանը։
Նա նշեց, որ հիմա սպասում են Գրիգոլ Վաշաձեի հայտարարությանը, ով այսօր ժամը 18։00-ին ընտրությունների, հետագա գործողությունների վերաբերյալ հանդես կգա հայտարարությամբ։
Վրաստանում նախագահական ընտրությունների երկրորդ փուլի արդյունքներն անօրինական է համարել Միխեիլ Սաակաշվիլին՝ կոչ անելով բողոքի ակցիաներ սկսել: Արսեն Կարապետյանը նշեց, որ սա Միխեիլ Սաակաշվիլիի անձնական կարծիքն է, իրենք սպասում են Վաշաձեի հայտարարությանը. «Սպասենք, տեսնենք՝ երեկոյան ինչ կհայտարարի ընդդիմությունը, դրանից հետո կտեսնենք՝ ինչ ենք անելու»,- ասաց նա։
Արսեն Կարապետյանի խոսքով՝ ցավոք սրտի, Վրաստանում այս պահին հաղթեց օլիգարխիան տասը տոկոսով, բայց պարզ չէ, թե ինչ կլինի վաղը կամ մյուս օրը: «Մենք սպասում ենք միասնական ընդդիմության քայլերին։ Իվանիշվիլին այս ընտրություններին պարտվել է ժողովրդի առաջ, գուցե հաղթել է Վաշաձեին, բայց պարտվել է Վրաստանի ժողովրդին։ Մեր հետագա քայլերը կլինեն արդեն բրենդ դարձած դուխով և անպայման, անպայման պայքարելով մինչև հաղթանակ»,- ասաց նա։
