«Ես և իմ քաղաքական թիմը հակված ենք խոսելու մեր ծրագրերից, անելիքներից։ Բավականին լավ վերաբերմունք կա մեր ծրագրին, մեր առաջարկություններին։ Դա հետաքրքրում է ընտրողին»,- «Առաջին լրատվական»-ի հետ զրույցում ասաց ԲՀԿ համամասնական ցուցակի 7-րդ համար Վահե Էնֆիաջյանը։
Նա նշեց, որ քարոզարշավին շատ լավ է տրամադրված, անթույլատրելիի շեմը չի անցնի, բայց եթե իր ընդդիմախոսները անցնեն այդ շեմը, շատ կոշտ պատասխան կստանան։
Վահե Էնֆիաջյանը նորմալ է համարում ցուցակում մականունավորների ընդգրկումը։ «Այս ամեն ինչի մեջ մի փորձեք արտառոց ոչինչ փնտրել։ Թեկնածուներին առաջադրել է քաղաքական խորհուրդը և վստահաբար ձեզ ասում եմ, որ մեր կողմից առաջադրվածները հասարակության մեջ մեծ հարգանք վայելող անձինք են, և մեր բնակչության կողմից ընդունելի ու ընկալելի են»,- ասաց պատգամավորի թեկնածուն՝ հորդորելով չկենտրոնանալ Գագիկ Ծառուկյանի թիկնազորի պետ Էդուարդ Բաբայանի թեկնածության վրա, քանի որ մեր երկրի քաղաքացին է որոշում՝ իր ձայնը այդ անձին տալ, թե ոչ։
Վահե Էնֆիաջյանը առավել կարևոր է համարում ժողովրդավարական չափանիշներով ընտրությունների անցկացումը, որի ժամանակ վճռորոշ է լինելու քաղաքացիների ձայնը։ «Մենք շատ իրատեսական ծրագիր ենք ներկայացրել։ Շեշտադրում ենք տնտեսական ոլորտը, տնտեսական հեղափոխությունը անհրաժեշտություն ենք համարում, և մեր բոլոր ծրագրերը տանում են դեպի դա»,- ասաց Էնֆիաջյանը։
Պատգամավորի թեկնածուն չասաց՝ ընտրվելուց հետո ԱԺ-ում ընդդիմություն են լինելու, թե կոալիցիա են կազմելու իշխանության հետ, և որքանով հնարավոր կլինի իրենց բավական հավակնոտ ծրագիրը իրագործել ընդդիմություն լինելու պարագայում, քանի որ Նիկոլ Փաշինյանը մեկ անգամ ակնարկել էր, որ նոր ԱԺ-ում կոալիցիաներ չեն լինելու։
Առավել մանրամասն՝ տեսանյութում։
