Այս օրերին նախկին իշխանությունները Նիկոլ Փաշինյանին մեղադրում են վարչական ռեսուրսի օգտագործման մեջ։ Արդյո՞ք մենք կարող ենք մարզային այդ այցերը, երևանյան երթերը դիտարկել հենց այս համատեքստում «Առաջին լրատվական»-ի հարցին իրավապաշտպան Վարդան Հարությունյանը պատասխանեց․ «Չեմ կարծում։ Նախ, դեռ ընտրարշավը պաշտոնապես չի սկսվել։ Այսօր բոլոր քաղաքական ուժերն էլ ներկայանում են, իրենց կարծիքներն են հայտնում, նաև նախկին իշխանության ներկայացուցիչներն են ամեն օր եթերներում լինում։ Այնպես որ, նման մեղադրանք ես ինքս այս պահին չեմ կարող հնչեցնել, և կարծում եմ, որ հնչեցրած մեղադրանքներն էլ տեղին չեն։ Երբ կսկսվի քարոզարշավի պաշտոնական մեկնարկը և կտեսնենք նման բաներ, իհարկե, կարող ենք արձանագրել։ Այս պահին սովորական գործընթաց է տեղի ունենում և բոլորն են ներգրավված դրա մեջ՝ սկսած սոցիալական կայքերից, վերջացրած հեռուստաեթերներով ու մամուլի այլ միջոցներով»։
«Այն գործընթացները, որոնք այսօր տեղի են ունենում, ինձ դուր չեն գալիս, որովհետև, հենց որ պետական, իշխանական կյանքում կլինի որևէ զարգացում, որը ես կհամարեմ ինձ համար ընդունելի և լավ ու էլ պահանջ չեմ ունենա, կհամարեմ, որ ես արդեն ծերացել եմ և թոշակի գնալու ժամանակն է։ Ես միշտ մտածել ու մտածում եմ, որ կարելի է անել ավելի լավ, քան արվում է»,- ասաց իրավապաշտպանը։
Ամբողջությամբ՝ տեսանյութում։
