ԱՄՆ դաշնային առևտրային հանձնաժողովը հավանություն է տվել Սոցիալական հետախուզության ընկերության գործունեությանը, որը հավաքում է օգտատերերի տվյալները Facebook-ում և տրամադրում դրանք ապագա գործատուներին: Այս մասին հաղորդում է ABC News-ը:
Այսպիսով, գործատուին տվյալներ վաճառելը համարվել է օրինական: Ընկերության կողմից հավաքված տեղեկությունները կպահվեն 7 տարի: Սակայն եթե օգտատերը բոլոր հրապարակումները ջնջի և իր էջը «իդեալական» դարձնի, ապա այդ ընկերությունը կարող է վերլուծել նրա ընկերներին և ըստ այդմ որոշում կայացնել, թե արդյո՞ք աշխատանքի ընդունվողը հուսալի է, թե ոչ: Կախված նրանից, թե ձեր ընկերները միասեռական են, հարուստ են, աղքատ են, ապրում են Կալիֆոռնիայում, Նյու Յորքում կամ Երևանում, այս ամեն ինչն իր մեջ վտանգներ է պարունակում, որ դուք կարող եք դուրս մնալ տվյալ աշխատատեղի համար մրցույթից:
ABC-ն նշում է, որ հիմա տվյալների հավաքագրումը կատարվում է մարդկանց կողմից, սակայն շուտով այդ գործընթացը կիրականացնեն հատուկ ռոբոտները, որոնք ավելի մեծ վտանգ են ներկայացնում օգտատերերի համար, քան տվյալներ հավաքագրող ընկերության սովորական աշխատակիցները:
