Քաղաքական վերլուծաբան Էդգար Վարդանյանի կարծիքով՝ ՀՀԿ-ն, լինելով նախկին ռեժիմի պահապանը, նպաստել է, որպեսզի հակադեմոկրատական, հակասահմանադրական ռեժիմը գոյություն ունենա, և ամեն ինչ արել է, որ այս հեղափոխությունը չլինի:
«Հիմա էլ փորձում է ամեն ինչ անել, որ վաղը-մյուս օրը կարողանա այդ հակահեղափոխությունը գոնե մասնակիորեն իրականացնել։ Այսօր ՀՀԿ-ն հասկանում է, որ չունի հանրային հենարան, չի կարող մրցել իշխող քաղաքական ուժի հետ, և ընդամենը ուզում է իր փոքրիկ տեղը պահպանել քաղաքական դաշտում, պահպանել ֆորմալ քաղաքական կոստյումը, որ երբ իրենց հետ խոսեն, ստիպված իրենց դիմեն որպես քաղաքական ուժ, այլ ոչ թե հակասահմանադրական քաղաքական ռեժիմին նպաստած մարդկանց, օլիգարխների խումբ»,- «Առաջին լրատվական»-ի հետ զրույցում ասաց նա։
Վարդանյանն ընդգծեց. «Հիմա իրենք ասում են, որ միակ ընդդիմությունը իրենք կարող են լինել, այնինչ իրենք ընդհանրապես չեն կարող ընդդիմություն լինել, որովհետև իրենք այլ քաղաքական ռեժիմի ջատագով են, ժողովրդավարական ռեժիմում տեղ չունեն։ Իսկ եթե ուզում են տեղ ունենալ, ուրեմն պետք է ընդունեն ժողովրդավարական քաղաքական ռեժիմի կանոնները, իսկ այդ կանոնները հաստատել է թավշյա հեղափոխությունը։ Եթե դու ժխտում ես թավշյա հեղափոխությունը, բնականաբար ժխտում ես նաև դեմոկրատիան։ Ուստի դու չես կարող համարվել ընդդիմություն, դու հակասիստեմային, ռևանշիստական քաղաքական ուժ ես»։
Ըստ Վարդանյանի՝ այսուհետ բոլոր այն ուժերը, որոնք պետք է մասնակցեն քաղաքական գործընթացներին, բնականաբար պետք է ընդունեն թավշյա հեղափոխության արդյունք հանդիսացող նոր դեմոկրատական քաղաքական ռեժիմը։
Հարցազրույցն ամբողջությամբ՝ տեսանյութում:
