Դեկտեմբերի 9-ին կայանալիք արտահերթ խորհրդարանական ընտրություններին մասնակցող 11 քաղաքական ուժերի միջև ընտրապայքարը, ըստ կանխատեսումների, բավականին թեժ է լինելու, քանի որ ընտրություններին մասնակցում են ոչ միայն քաղաքական դաշտի հնաբնակները, այլ նաև նոր, թարմ դեմքեր:
Արտերկրում կրթություն ստացած և միջազգային աշխատանքային փորձ ունեցող Վահրամ Ավագյանն, ով «Լուսավոր Հայաստան» կուսակցության կողմից ռեյտինգային ընտրակարգով առաջադրվել է որպես պատգամավորության թեկնածու, թեմայի շուրջ «Առաջին լրատվական»- ի հետ զրույցում կարծիք հայտնեց, որ բոլոր պետությունների լավ կամ վատ լինելը՝ օրինակ՝ լավ տնտեսական ցուցանիշներ ունենալը, միանշանակ պայմանավորված է կիրառված համակարգային լուծումներով: Նա նաև ընդգծեց, որ ԱԺ-ն այն հարթակն է, որի միջոցով հնարավոր է հասնել լուրջ փոփոխությունների:
Անդրադառնալով դիտարկմանը, որ ՀՀԿ-ն քննադատում է ԼՀԿ-ին՝ իշխանության հասցեին քննադատական խոսք չհնչեցնելու պատճառով, Վ. Ավագյանը նշեց. «Ընդդիմությունը ես չեմ ընկալում որպես մի ուժ, որը միայն քննադատելու առաքելություն ունի: Քննադատությունները պետք է լինեն տեղին, պետք է առաջարկել լուծումներ, ոչ թե միայն քննադատել»:
Պատգամավորության թեկնածուի կարծիքով՝ ընտրապայքարը պետք է լինի գաղափարական, և ընտրությունը պետք է պայմանավորված լինի գաղափարներով ու նախագծերով և ոչ թե անձերով:
«ԼՀԿ-ն ներկա քաղաքական իրավիճակում հենց այն ուժն է, որը ոչ միայն կքննադատի և լուծումներ կառաջարկի, այլ նաև կդառնա երկխոսության պլատֆորմ»,- ընդգծեց Վ. Ավագյանը:
Մանրամասն՝ տեսանյութում:
