Գազի գնի թանկացումից տուժում է ոչ միայն Հայաստանի, այլև Լեռնային Ղարաբաղի քաղաքացին: Որքան որ ծանր է մեր քաղաքացիների համար վճարել դեկտեմբեր ամսվա կոմունալ վարձավճարները, նույնքան ծանր է դա անել նաև Լեռնային Ղարաբաղում:
Արցախի վարչապետ Արա Հարությունյանի մամլո խոսնակ Արտակ Բեգլարյանը մեզ հետ զրույցում խոսելով գազի գնի, դրա թանկացման մասին` ասաց, որ այն Հայաստանի և Լեռնային Ղարաբաղի համար նույնն է. «2013 թվականի օգոստոսի 1-ից գազի գինը ամսական մինչև 10.000 խորանարդ մետր օգտագործողների համար 156 դրամ է, նույնը ինչ որ ՀՀ-ում, իսկ 10.000 խորանարդ մետրից ավել օգտագործողների համար գործում է հետևյալ բանաձևը՝ 290 անգամ դոլարի գին, բաժանած 1000-ի: Եթե պայմանականորեն դոլարի գինը 405 է, ստացվում է մոտ 117 դրամ: Խոշորի համար այս բանաձևը 2013 թվականի հուլիսի 10-ից է գործում: Իսկ բնակիչների համար նույն գինն է»:
«Առաջին լրատվական»-ի հետ զրույցում Արցախի ժողովրդավարական կուսակցության պատգամավոր Արևիկ Պետրոսյանը նշեց, որ այս հարցում բացարձակապես ոչ մի տարբերություն չկա Հայաստանի և Արցախի միջև, այն թանկացումները, որ ՀՀ հասարակ քաղաքացին իր վրա զգաց արդեն այս ամիս վճարելով գազի դեկտեմբեր ամսվա վարձավճարը, ստիպված եղավ վճարել նաև Արցախի քաղաքացին: Նրա խոսքերով՝ այդ կապակցությամբ և նաև սուբսիդավորելու վերաբերյալ Ազգային ժողովում քննարկում չի եղել:
«Հելսինկյան-92» նախաձեռնության ղարաբաղյան համակարգող, իրավապաշտպան Կարեն Օհանջանյանն էլ մեզ ասաց, որ չնայած թանկացումներին, իրավիճակն Արցախում այնքան սուր չէ, որքան Հայաստանում. «Իմ ունեցած տեղեկություններով՝ մարդիկ նույնիսկ կրեդիտ են վերցնում կոմունալ ծախսերը փակելու համար, բայց այդ ամենի դեմ չեն պայքարում: Այստեղի ժողովուրդն ավելի հանդուրժող է, քան Հայաստանում, և դրա համար մի քանի պատճառ կա»: Դրանցից հիմնականը, ըստ Օհանջանյանի, այն է, որ Արցախի ժողովուրդը շատ լավ գիտակցում է, որ այդ թանկացումների պատճառը ոչ թե Արցախի ղեկավարությունն է, այլ Հայաստանի. «Մի փոքր այն չի լինի, որ դուրս գան այստեղ պայքարելու, բոլորն էլ հասկանում են, որ այդ որոշումները Հայաստանից են գալիս: Հետո էլ` չեմ թաքցնի, որ ի տարբերություն Հայաստանի` մարդիկ այստեղ ավելի հանդուրժող են, չգիտեմ դեռ որքան կարելի է հանդուրժել և գլուխը կախ ընդունել այն ամենը, ինչ կատարվում է»:
Մեզ հետ զրույցում Ստեփանակերտ քաղաքի բնակիչներից մեկն էլ, ով բազմանդամ ընտանիք ունի, նշեց, որ այս տարի դեկտեմբեր ամսվա համար բավականին մեծ գումար է վճարել գազի համար. «Բոլորն իրար հետ անցել է 70.000-ը , այս տարի շատ ավելի եմ վճարել, քան նախորդ տարի: Ի դեպ, ասեմ ամբողջ ամսվա ընթացքում բավականին շատ էլ տնտեսել ենք: Չգիտեմ` ոչ այն է սոված-ծարավ նստես, տունդ տաք լինի, ոչ էլ այն է ցրտի մեջ նստես, նորմալ հաց ուտես: Եվ սա ոչ միայն ինձ համար եմ ասում, ում խոսեցնես` այդ է ասում, թանկացումներին տեղ ու դադար չկա»:
