Լոնդոնի ռեստորաններից մեկի մատուցողը փորձել է «ձերբակալել» Բրիտանիայի նախկին վարչապետ Թոնի Բլեերին՝ Իրաք ներխուժելու համար, որն իրականացվել էր 2003 թ.՝ նրա որոշման համաձայն:
Դեպքը տեղի է ունեցել Tramshed ռեստորանում, որտեղ նախկին վարչապետը ճաշել է ընտանիքի և ընկերների հետ, հաղորդում է ИТАР-ТАСС-ը:
Անգլոսաքսոնական իրավաբանական համակարգում գոյություն ունի «քաղաքացիական ձերբակալություն» հասկացությունը, երբ մարդը, ում փնտրում են իրավախախտումների համար կամ ում բռնել են հանցանքի վայրում, կարող է ձերբակալվել պաշտոնական լիազորություններ չունեցող անձի կողմից:
Մատուցողը մոտեցել է Բլեերին, ձեռքը դրել նրա ուսին և ասել. «Պարոն Բլեեր, սա աշխարհի դեմ Ձեր կատարած հանցագործության համար քաղաքացիական ձերբակալություն է, մասնավորապես՝ Իրաքի դեմ պատերազմ սկսելու որոշման կայացման համար: Ես առաջարկում եմ Ձեզ ինձ հետ ոստիկանական բաժանմունք գնալ, որտեղ էլ կպատասխանեք իմ մեղադրանքներին»:
Ընտանիքը պաշտպանել է Թոնի Բլեերին, իսկ նրա որդիներից մեկը կանչել է նույն հարկում կանգնած անվտանգության աշխատակցին:
Այս դեպքից անմիջապես հետո Թվիգի Գարսիան ազատվել է աշխատանքից:
Թոնի Բլեերի մամլո քարտուղարը հաստատել է, որ նման դեպք տեղի է ունեցել, սակայն նշել է, որ ոչ մի արտառոց բան չի կատարվել:
