«Ես չէի ասի, որ մեզ համար միևնույն է, թե ինչ Ընտրական օրենսգրքով կգնանք ընտրությունների: Իհարկե, ՔՊ-ի համար ցանկալի էր, որ այս ընտրակարգը փոխվեր»,- «Առաջին լրատվական»- ի հետ զրույցում այս մասին ասաց ԱԺ «Ելք» խմբակցության ղեկավար Լենա Նազարյանը՝ հավելելով, որ չնայած մեղադրում են, որ բավարար ջանք չեն գործադրել նոր ԸՕ-ն ընդունելու համար, սակայն այդ մեղադրանքի մեջ տրամաբանություն չկա. «Ի՞նչ շահ ունեինք մենք»:
«Մեր ցուցակում չեն լինի այնպիսի մարդիկ, որոնք ձայն են բերում այն մեթոդներով, որով բերում էին ՀՀԿ-ի համար»,- վստահեցրեց «Ելք» խմբակցության ղեկավարը:
Հայաստանում քաղաքական քծնանքն ու պատեհապաշտությունը կործանարար հետևանքներ են ունեցել: Շատերը կարծում են, որ այդ վտանգի առջև է կանգնած նաև հեղափոխական ուժը, որովհետև բոլորը հիմա ձգտում են տեղավորվել նրա տանիքի տակ: Անդրադառնալով այս դիտարկմանը՝ Լ. Նազարյանն ընդգծեց, որ իրենք ուշադրությամբ զրուցում են նրանց հետ, ովքեր ՔՊ ցուցակում լինելու ցանկություն են հայտնում. «Մեզ համար առաջին հերթին կարևոր է մարդու քաղաքական կերպարը, քաղաքական մտքեր ձևակերպելը, կրթությունը, մասնագիտական փորձը, վստահելիությունը… նախկինում նրանց կուսակցական պատկանելությունը վերջին տեղում է»:
Հարցին, թե ինչն է ստիպում դիմել ՀՀԿ կուսակցական բազային, Լ. Նազարյանը նշեց, որ իրենց ցուցակում ՀՀԿ-ից կլինեն մեկ կամ երկու հոգի. «Այդ թեկնածուները ընդունելի կլինեն հանրության համար, քանի որ այս ընթացքում նրանք հանրայնորեն հայտնել են իրենց կարծիքը և դիրքորոշումը»:
Լենա Նազարյանի կանխատեսմամբ՝ ապագա Ազգային ժողովի ընդդիմադիր հարթակում կհայտնվեն «Ծառուկյան» դաշինքը, «Լույս» դաշինքը և ՀՀԿ-ն:
Մանրամասն՝ տեսանյութում:
